La gran aventura de Winnie de Pooh

"Non puiden elixir a quen me trouxo ao mundo pero podo elixir ao meu amigo. Nesta procura empeño a miña propia alma pois, cunha amizade verdadeira, a vida tórnase máis simple, máis rica e máis bela." Charles Chaplin. 

Tivemos con nós á pisacharcas Laura, nai de José Manuel de 4 anos A, que veu a contar o conto "La gran aventura de Winnie de Pooh". Consiste nunha aventura que xurde dun malentendido e dunha preocupación por un amigo desaparecido. Un relato onde abundan as boas intencións, o apoio dos amigos e a valentía para arriscarse por outros. Un clásico tamén do cine infantil que segue resultando entrañable para os máis pequenos e pequenas. Grazas a estas nais e pais por seguir ca tradición de vir a relatar historias á nosa biblioteca e entreter á vez que se transmiten mensaxes positivas neste caso sobre a amizade.

Radio na escola

De novo alumnado de 4º de educación primaria pon a proba a radio do Ceip Rosalía de Castro. Nesta ocasión varias alumnas traballaron todo o ano recopilando castigas galegas para o proxecto "Escolas de Fronteiras".  Visitaron a Escola António Feijó en Ponte da Lima e foron cantarlle ós nosos veciños e colaboradores unha versión en portugués da famosa "A Carolina". Deixámosvos a mostra do ben que o fan, tanto en portugués como en galego. Desfrutade!

 

Preme nesta ligazón para escoitar o podcast

Visitamos a Biblioteca Pública Antelana

 Fai uns días, parte do alumnado de Educación Primaria do colexio Rosalía de Castro participou no remate do ciclo de actividades para conmemorar o Día das Letras Galegas na Biblioteca Antelana de Xinzo. A actividade de animación á lectura consistiu nun contacontos escenificado con inspiración na obra O Bosque animado de man de Eduin Arias e Alejandra Gómez. Foi un pracer colaborar entre bibliotecas do pobo. 

Los músicos de Bremen

" A paciencia é amarga, pero o seu froito é doce". 

Contos dos irmáns Grimm. 

Lucía, nai pisacharcas de Kenia de 3 anos A, rescatou un clásico dos irmáns Grimm, un relato que sigue vixente polo seu valor cultural e polas ensinanzas morais que contén. Catro animais de avanzada idade e aparentemente con pouca utilidade ara os seus donos, un burro, un can, un gato e un galo únense para levar a cabo unah misisón. Logran desfacerse duns ladróns emitindo os seus sons ao unísono. Unha historia sobre cooperación, astucia e superación. 

Radio na escola

Os nenos e nenas de 6º redactaron un texto reflexionando sobre os coidados das mascotas, sobre os beneficios e inconvintes da adopción ou da compra e o alumnado de 4º plasmou as súas ideas neste podcast. Agardamos que o disfrutedes e que sexan de proveito as súas ideas e reflexións. Deixámosvos a ligazón ao drive para poder escoitalo. 

https://drive.google.com/file/d/1v_LVlEZRRr4MnTFY0dWcuZAp1SQmLbeC/view?usp=sharing

 

Aloia e a súa estraña dor de barriga

O conto que vos presentamos hoxe foi dado a coñecer por Ana Campelo, nai de Ana Aguiar de 1º A. O conto xira en torno a súa protagonista, unha nena caracterizada polas pinzas de cores do seu pelo que sofre ao ir á escola a raíz do bullyng que lle fan os seus compañeiros. Grazas a un dos seus amigos, atopa a valentía para contalo e poder loitar contra o acoso escolar dende a propia a escola. Este é un tema primordial para tratar no contexto educativo e por eso estamoslle moi agradecidos e agradecidas a esta nai pisacharcas por traelo á nosa biblioteca escolar. 

8M: Día da Muller

 "O empoderamento das mulleres conduce ao empoderamento da humanidade" – Michelle Obama.

Co gallo da conmemoración do Día Internacional da Muller, o CDR O Viso e a nosa ANPA veñen de organizar unha exposición cos traballos e os textos que deron pé o pasado curso á publicación do libro "Mulleres Ilustradas da Limia".

Esta é unha oportunidade única para ver en gran formato os traballos plásticos que realizaou o noso alumnado, tomando como punto de partida a estas mulleres senlleiras.

A exposición está aberta para toda a comunidade escolar na Aula de Psicomotricidade no primeiro andar do centro, dende o luns, 9 ata o xoves 12 de marzo, en horario de 14.00 a 15.45 horas. 

Derradeira reunión do Consello da Infancia no 2025

" A Educación é o pasaporte cara ao futuro, o mañá pertence a aqueles que se preparan para el no día de hoxe." Malcolm X, activisita estadouindense 

Este  luns reuniuse de novo o Consello da Infancia.

Comentamos a noticia que saíu na prensa sobre o premio recibido polo colexio.

Tamén puxemos en común as propostas de mellora das aulas e fixemos a foto de familia.

Acordamos analizar as propostas na próxima reunión que se celebrará en febreiro.

Comentamos a problemática do fútbol nos recreos e aportamos ideas para a celebración do día escolar  da non violencia e a Paz en xaneiro.

Estamos moi orgullosas do funcionamento deste órgano de participación do alumnado, a implicación é máxima e as ideas sempre son interesantes.

EXPERIMENTO: QUE PASA CAS CORES?

 O venres 17 de outubro as aulas de 3 anos A e B xuntáronse cos avoiños do Centro de Día. No seo das actividades do Espazo Creativo da nosa biblioteca, tanto maiores como pequenos levaron a cabo un experimento científico cheo de cores e texturas. 

Se queredes saber cal foi o resultado que deixou abraiado a algún que outro e que mantivo a atención de todos e todas, teredes que:

1º- Nun recipiente con pouca profundidade botar leite como base.

2º- Enriba do leite deixamos caer (sen mesturar) varias gotas de cada (amarelo, azul e vermello) do colorante alimenticio líquido. 

3º- Mollar abundantemente un hisopo de algodón en xabón de cociña ou deterxente.

4º- Introducir o hisopo no leite, deixalo en repouso dentro e agardar o efecto!

Esperamos que o disfrutedes tanto como nós, pois no Ceip Rosalía de Castro o alumnado de infantil xa agarda impaciente a seguinte visita destes e destas grandes colaboradoras que tanto teñen por ensinar. Moitísimas grazas pola visita!

MOCHILA VIAXEIRA DE 4º B

 "Non saber o que ten sucedido antes de nós é como ser incesantemente nenos"

Cicerón

Dende fai décadas, a sociedade deu grandes pasos en prol da igualdade. Sábese que un dos camiños para lograr derrubar estereotipos de xénero é presentando á rapazada modelos de mulleres fortes e testemuñas de historias reais protagonizadas e loitadas por elas e por tanto cun papel importante na historia. Este libro, incluido na mochila viaxeira de 4º B de educación primaria, "DANIELA E AS MULLERES PIRATAS DA HISTORIA", contribúe a unha socialización dos rapaces e rapazas máis igualitaria e xusta ca historia as veces silenciada do sexo feminino. O conto nos relata como Daniela descobre un antigo libro da súa avoa coa historia de dez valentes mulleres piratas. Dende os mares da China ata a costa de Nova York, dende a antiga Grecia ata os tempos modernos, estas mulleres piratas surcaron os océanos en busca de riquezas. Aínda que moitas veces tentaron impedirlles navegar, elas negáronse a aceptar o seu destino ou loitaron por melloralo. Awilda, Mary Read, Lai Choi San, Grace O’Malley, Ching Shih… As súas vidas e fazañas inspiraron a Daniela.

Non se pode rematar a publicación sen mencionar o incrible traballo realizado por Lucas e a súa familia. Perfecto globo terráqueo co que traballar dun xeito integrado a historia, a xeografía e valores!

Neste conto non hai ningún lobo feroz

"As persoas libres xamais poderán concebir o que os libros significan para aqueles de nós que vivimos encerrados" 

Ana Frank.

Estes días tivemos outra visita dunha nai pisacharcas. Ela é a mamá de Zara de 6º de educación infantil B. Os nenos e nenas desta clase estiveron moi atentos a "NESTE CONTO NON HAI NINGÚN LOBO FEROZ", unha encantadora historia que explora a vida de Lorenzo, un lobo que chega sempre tarde ás narracións dos contos clásicos, o que provoca situacións cómicas e reflexións sobre os roles nas historias.

 Trátase dun libro que pode ser disfrutado tanto na escola como en familia e que, ao mesmo tempo, pode servir de punto de partida para conversas interesantes sobre a natureza dos contos e sobre a importancia, as veces, de cuestionar as normas. Un relato que non decepciona. 

La ovejita que vino a cenar

 "Un libro é un regalo que podes abrir unha e outra vez."

Garrison Keillor, autor norteamericano.

Como nos gustan os contos con lobo feroz e final feliz! E como desfrutaron os nenos e nenas de 3 anos A gracias á mamá pisacharcas Leticia, nai de Vera .

"La ovejita que vino a cenar " preséntanos a un lobo un tanto atípico e detallista que, aínda que con ganas de cambiar a súa dieta vexetariana, non dubida en coidar da máis tierna das ovellas. Os rizos brancos, o seu tamaño e a fala de bebé, entre outras, aportan as risas e a tenrura. 

Ademáis o conto consigue transmitir mensaxes cheas de dozura sobre a necesidade de dar e recibir agarimo, sobre a importancia da amizade e sobre a ledicia de compartir a nosa vida con alguén a quen queremos. Unha historia para aprender dende a escola a coidar e a ser feliz. 

Os Tres Porquiños

"O único que importa é o final, é a parte máis importante dun conto" 

Paulo Coelho.

A historia que nos veu contar Tamara, a nai pisachacas de Martín Moreno da clase de 4 anos, segue a tres coñecidos irmáns que deciden construir as súas propias casas dun xeito diferente e narra o encontro co lobo feroz que intenta atrapalos. 

"Os Tres Porquiños" segue sendo un conto que fascina a xeracións, tanto pola simplicidade, o atractivo visual e pola poderosa moralexa que encerra: o esforzo, a dedicación e a previsión son claves para o éxito e a seguridade. 

Ademáis o conto destaca o valor da colaboración e do apoio mutuo. Cando as casas de palla e madeira fallan, os porquiños non quedan solos ante o perigo. En lugar diso, apóianse na fortaleza construída polo seu irmán maior, demostrando que a unidade e o traballo en equipo son fundamentais para superar adversidades.

Deste mesmo xeito, a Biblioteca Escolar, pretende ser un punto de apoio e unha canle de colaboración entre a escola e as familias co obxectivo de construir un futuro sólido para o alumnado.

Esto non é unha selva

 “A lectura é a chave máxica que abre as portas dun mundo de marabillas.”

Frank Serafini, profesor de educación literaria e literatura infantil.

Todo comezou o día que Paula decidiu dicir que non. Dicir que non era xenial. Paula podía facer o que quixese…Pero entón sucedeu o inesperado: a súa casa converteuse nun caos, nunha auténtica selva con árbores, lianas, vexetación frondosa… e todos os animais campando a súa libre vontade. Finalmente espertará do seu soño e todo volverá á normalidade, coa diferenza de que agora ela está encantada de facerse cargo das súas responsabilidades.

"Esto non é unha selva" foi o relato que tivemos a sorte de escoitar en voz de Estefanía, a nai de Anxo de 4 anos. Unha historia cautivadora sobre o que sucede cando os nenos desafían aos adultos.

A vaca que puxo un ovo

"Un libro é unha proba de que os seres humanos son capaces de facer maxia". 

Carl Sagan., divulgador científico estadounidense

Non paramos de recibir novas visitas na nosa Biblioteca Escolar. Desta volta foi  Susana, a nai de  Ximena de 4 años,  a que nos contou o conta de " A VACA QUE PUXO UN OVO".

Marjorie era unha vaca que andaba bastante tristeira ata que as súas amigas as pitas decidiron que xa era hora de que puxese un ovo! Nunca liches unha historia igual onde o humor e amizade están a partes iguais. Este libro trata as relacións desde o punto de vista da forza do amor, que non mira nin a razas nin a especies, valores que son sinais de identidade do noso cole!!

Fixemos babot e pizza!

Durante todo o curso o alumnado de catro anos realizamos diferentes receitas grazas ao acompañamento das nosas familias.

As últimas dúas foron unha deliciosa pizza, da cal eliximos entre todos e todas os ingredientes e tamén un pan típIio de Marrocos: o BATBOT, un pan tipo pan de pita que nesta ocasión acompañamos de marmelada... Unha delicia!

O máis importante para nós foi poder compartir estes momentos coas nosas marabillosas familias que nos acompañan e nos axudan no día a día na nosa aprendizaxe.

GRAZAS, FAMILIAS!!

Saída á granxa

Dentro do proxecto Quen vive na Limia? centrado nos animais que viven na nosa contorna, o alumnado de catro anos aceptou a invitación de tres alumnas do nivel para visitar os seus animais.

Tivemos a sorte de visitar a granxa de porcos de Iria, onde puidemos ver ás nais e  aos porquiños. Tamén saudamos á sua cadeliña, demos de comer ao seu cabalo e recollimos os ovos das galiñas.

Despois visitamos cerca da Saínza as vacas de Nagore, e a súa “burrita Lolita”, que comeu moitas cenorias e deixou a quen quixo subir ao seu lombo.

De paso alimentamos tamén aos coellos e pitas da avoa de Carmen.

Foi unha mañá fantástica, na que tamén nos invitaron á merenda e nos coidaron tanto que sempre nos quedarán ganas de volver!

Creando lembranzas

"El mejor trabajo es el que se hace en equipo" Hernán Sabio 

O profesorado, as familias e o alumnado de Educación Infantil gozaron todos xuntos dunha xornada especial, chea de emocións e diversión. Os xogos, bailes e a creatividade foron unhas das actividades principais desta xornada onde o traballo en equipo e a convivencia foron os verdadeiros protagonistas. Uníronse as fortalezas de cada un para acadar unha  meta compartida: crear recordos inolvidables para os nosos cativos.

Aprendemos a estar ben informad@s

"Saber onde atopar a información e como usala. Ese é o secreto do éxito" Albert Einstein, físico

O noso alumnado de quinto de Educación Primaria visitou a La Región e Telemiño.

#DiaMundialAutismo #SomosInfinitos

«Cada pequeno logro na viaxe do autismo merece ser recoñecido e aplaudido, lembrándonos que o progreso se mide en pasos, non en saltos.» Sally Ozonoff, Profesora universitaria especialista en psiquiatría e comportamento social na Universidade de California.

O autismo é un trastorno do desenvolvemento que afecta á comunicación e á interacción social. O azul é a cor que se asocia a el. Desde hai anos, utilizouse para dar visibilidade ás persoas con trastornos do espectro autista (TEA), así como para mellorar a súa comprensión, promover a súa aceptación, difundir as súas experiencias, reafirmar os seus dereitos e, en definitiva, sensibilizar á sociedade con esta realidade.

A Asemblea Xeral da ONU designou o 2 de abril como Día Mundial de Concienciación sobre o Autismo no ano 2007. A asociación estadounidense Autism Speaks creou en 2010 a iniciativa Light It Up Blue (en español, Ilumina de Azul) para apoiar ás persoas con trastornos do espectro autista. Segundo explica a organización Autismo España, cada 2 de abril miles de edificios e monumentos emblemáticos de todo o mundo ilumínanse coa cor azul "como mostra de apoio e solidariedade coas persoas con autismo e as súas familias". Más de 400 fixérono en España en 2024.