Aprendemos a estar ben informad@s

"Saber onde atopar a información e como usala. Ese é o secreto do éxito" Albert Einstein, físico

O noso alumnado de quinto de Educación Primaria visitou a La Región e Telemiño.

O mundo está roto pero pódese camiñar

"Cando todo pareza ir na túa contra, lembra que o avión despega contra o vento", Henry Ford, empresario estadounidense. 

O noso alumnado de quinto e sexto de Educación Primaria asistiu hoxe á representación por parte da compañía Contra Produccións da obra "O mundo está roto pero pódese camiñar", que é unha peza para público infantil e familiar que, nun ton poético e nunha estética fresca e luminosa, conta o relato dunha reconciliación, coa vida e co seu pai, dunha nena de dez anos ferida por unha perda traumática.

Nesta obra unha nena perde prematuramente a súa nai e, desde entón, está enfadada co mundo. O pai non sabe como romper o muro de incomunicación no que se encerrou a filla e argalla un curioso sistema: escribirlle mensaxes en avións de papel que lle lanza cada día desde o balcón e onde lle encomenda pequenas tarefas diarias como, por exemplo, ir devolver un libro á biblioteca.

Unha bibliotecaria amena e espelida axuda á nena a descubrir o vínculo entre os libros e a vida, logrando establecer coa cativa unha relación divertida, construtiva e inspiradora. Moitos anos despois, a nena, agora escritora, voltará á biblioteca para contarnos aquela experiencia iniciática e sanadora. (https://bit.ly/3O812bH)

Despois todo o grupo deu un "paseo didáctico" por Ourense, descubrindo lugares historias que pensamos foron do seu agrado. Unha xornada completa de aprendizaxes nun contexto distinto ao de outros días!

Visitamos o Centro do Lobo Ibérico

"Un home pode facerse amigo dun lobo, pero ningún home será capaz de domesticalo en realidade." George R. R. Martin, escritor estadounidense.

O alumnado de terceiro de Primaria visitou o Centro do Lobo Ibérico de Castela León en Robledo de Sanabria. Alí poderon comprobar de primeira man que fermoso é este animal e aprender un montón de datos e curiosidades sobre este cánido que pobra os nosos montes.

Remataron o día cunha visita a un dos "Pueblos más bonitos de España", como é Puebla de Sanabria, coas súas empinadas rúas e o seu Casco Histórico Medieval.

Unha xornada chea de aprendizaxes significativos e que recordarám estas nenas e nenos por moito tempo!

Hugo: Empatía, diversidade, a beleza de sermos diferentes.

"A inclusión non é só un termo, é un compromiso diario de aceptación e respecto pola diversidade."  Stella Young, comediante australiana, xornalista e activista dos dereitos da discapacidade

Gañadora do Premio María Casares ao mellor espectáculo para o público infantil e familiar no ano 2022. Hugo conta a historia dun neno que é diferente. Gústanlle moito os avións e tamén toca o piano. Laia visita a Hugo cada día. A Laia gústalle falar e gústanlle as plantas. Hugo ten TEA.

Unha peza teatral que aborda o tema do trastorno do espectro autista na infancia, chea de sensibilidade e empatía, que fala da diversidade, da convivencia e da beleza de sermos diferentes. https://escolares.afundacion.org/actividad/hugo/

Esta obra presenta valores que son chave dentro do noso Proxecto Educativo de Centro, onde a inclusión e a atención á diversidade son algunhas das bases sobre as que construímos o noso quefacer diario. 

O noso alumnado complementou esta xornada cunha visita didáctica á cidade de Ourense, identificando os principais monumentos e lugares de interese, como son As Burgas, o edificio do Concello, a Catedral e o Xardín Botánico.

Iniciando a nosa aventura

 "Caminante, no hay camino, se hace camino al andar". ~A. Machado ~

O noso alumnado de 5º de Ed. Infantil decidiron pórse en marcha para vivir en primeira persoa e aprender "in situ" todo sobre os monumentos da nosa vila.

Coa Dama da Lagoa, Torre de Pena e a Pedra Alta inician o seu propio camiño sumando e compartindo experiencias, vivenzas e aventuras.

Quedamos con ganas de repetir outras andanzas coma esta!!

Lendo etiquetas para coidar da miña saúde

 “Só hai un medio para manter en pé unha sociedade libre e é manter ao público informado.” Joseph Pulitzer

Sabemos o que comemos? Somos capaces de ler as etiquetas e distinguir relamente o que estamos a consumir? Coñecemos realmente a cantidade de azúcares e outros compoñenetes nocivos para a nosa saúde que están presentes na maioría de bebidas e bollería industrial que comemos día a día?

As resposta a estas e outras moitas pregunta foron o obxecto do obradoiro que o Grupo de Innovación Docente “Aliméntate con Ciencia e Conciencia” formado dentro da Universidade de Vigo impartiu ao noso alumnado de 2º,4º e 6º durante o día de hoxe.

"Estímase que 2000 millóns de persoas en todo o mundo teñen sobrepeso ou son obesas e o 40,6 % da poboación infantil española ten exceso de peso (Estudio Aladino, 2019). A obesidade relaciónase cun maior risco de padecer distintas enfermidades (cardiovasculares, diabetes, etc.) que afectan a calidade de vida das persoas e ao seu benestar. Unha alimentación sa e saudable pode axudar a combater a obesidade. Malia todo, a poboación non ten demasiada formación en temas alimentarios e nutricionais. Para facer unha compra axeitada ás nosas necesidades nutricionais é prioritario ler e entender a información alimentaria que se amosa na etiqueta dos alimentos envasados. Unha correcta comparación do etiquetado nutricional e da lista de ingredientes entre alimentos similares é imprescindible para implantar hábitos saudables e escoller aqueles alimentos que presenten un menor contido de sal, azucre e graxas saturadas e/ou un maior contido en fibra, e graxas mono- e poliinsaturadas.

Co gallo de dar unha resposta a esta necesidade social, no ano 2022 creamos na Universidade de Vigo o Grupo de Innovación Docente “Aliméntate con Ciencia e Conciencia”, o cal pretende acercar o coñecemento en materia alimentaria ao alumnado, universitario e preuniversitario, formándoos como consumidores e desenvolvendo un espírito activo na promoción da súa saúde. Para iso:

• Estamos a elaborar materiais divulgativos (podcasts, píldoras de aprendizaxe e vídeos) que se distribuirán entre o alumnado.
• A maiores, puxemos en marcha o Proxecto de Innovación Educativa en Aprendizaxe-Servizo (Aps): Lendo etiquetas para coidar da miña saúde no que participan os nosos alumnos do Grao en Ciencia e Tecnoloxía dos Alimentos e os centros educativos de educación primaria da contorna. Mediante a súa participación voluntaria, o noso alumnado adquire competencias transversais da titulación e outras específicas, pon en práctica os coñecementos adquiridos, e desenvolve habilidades e actitudes mediante un servizo á comunidade."

https://foodandhealthomics.es/grupo-innovacion-docente

Unha mañá chea de aprendizaxes significativos e relacionados cos ODS, especialmante co ODS 3 Saúde e Benestar,  que fan que a partir de hoxe todo o nos alumnado sexa quen de saber realmente o que están a consumir e sexa competente para racionalizar o consumo destes azúcares nocivos para a súa saúde.

Vaia ritmo!

 "A música é a miña vida, e o ritmo é a miña alma." Buddy Rich, baterista de jazz estadounidense.

O noso alumnado de 1º e 2º de Edcación Primaria acudiu hoxe á posta en escea desta "permormance" que inclúe Afundación a través do seu programa de actividades para escolares.

"Improvisación e imaxinación para espertar o enxeño con este concerto que propón Odaiko. A través do factor sorpresa, e facendo uso do humor e a interacción, preséntannos diferentes elementos de percusión que nos levarán a melodías cheas de ritmo e, polo tanto, con diversión garantida."  (https://escolares.afundacion.org/actividad/vaia-ritmo/)

Coñecemos a pegada franciscana na cidade de Ourense

"O verdadeiro ensino que transmitimos é o que vivimos; e somos bos predicadores cando poñemos en práctica o que dicimos." San Francisco de Asís

O alumnado de sexto de Primaria tivo a oportunidade de participar da man do Arquivo Histórico Provincial de Ourense en dúas actividades relacionada coa pegada que os monxes franciscanos deixaron na cidade de Ourense.

Por unha banda, fixeron a visita dramatizada "Os segredos dos franciscanos", deseñada especialmente para complementar coñecemento sobre o legado histórico e artístico que os franciscanos deixaron na cidade de Ourense. Nesta actividade tamén se pon en valor o patrimonio documental, moi rico e descoñecido para moitas persoas de calquera idade, dunha forma amena, dinámica e adaptada a cada nivel educativo. 

Xoana a lavandeira e Frei Xan o Farrapeiro invitaron  a descubrir ao noso alumnado os segredos dos franciscanos a través dun percorrido por lugares emblemáticos da cidade que rematou cun entretido xogo histórico no claustro do antigo convento de San Francisco, hoxe sede o Arquivo Histórico Provincial.

O outro grupo levaron a cabo o Obradoiro de escritura medieval, onde de xeito moi participativo coñeceron todo o relativo á escritura da Idade Media, poñendo en valor singulares documentos históricos do período. Aprenderon como elaboraban a tinta os monxes daquel tempo e utilizaron unha pluma de ave para escribir un documento que deu  fe da liñaxe de cada participante.

Trátase dunha experiencia moi enriquecedora dende o punto de vista didáctico, xa que permite ver o contraste existente entre os nosos acelerados tempos dixitais fronte a un pasado analóxico no que a pericia manual e o tempo pausado eran a dinámica da cultura.

Banksy asolaga Verín

"Un muro é unha arma moi grande. É unha das cousas máis desagradables coas que podes golpear a alguén". Bansky 

O pasado luns, 5 de xuño o noso alumnado de quinto de Ed. Primaria percorreu durante máis de dúas horas  o proxecto que puxo en marcha o Concello de Verín  que consta dun total de 23 obras do artista "callejero" Banksy.

Esta iniciativa  ten por obxectivo rehabilitar espazos degradados da vila e eliminar eses "feísmos" cun roteiro que recolle gran parte da  obra do artista. 

Contamos desta volta co grande privilexio de contar co artista responsable desta iniciativa,  Alex Araújo, quen nos deu todo tipo de explicacións tanto sobre as obras orixinais como sobre como el enfrontou o difícil reto de ser o máis leal posible nas súas reproduccións.

Tamén o alumnado participou na presentación dalgunhas das obras que visitamos, xa que nas semanas previas tiñan traballado sobre o grafiteiro e a súa obra na área de plástica, impartida na sección bilingüe pola súa mestra Rochi.

Unha mañá chea de aprendizaxes, feitas no propio entorno e co seu protagonista como "mestre" excepcional! Moitas grazas, Alex polo agarimo e empatía con que nos trataches!

Onde o mundo se chama Celanova

Cantiga pra durmir a un neno

"Celanova ten un vento,

Celanova un vento ten,

un vento peleriñante,

un vento que vai e ven." 

Celso Emilio Ferreiro

Da man de Fundación Curros Enríquez, hoxe o noso alumnado de sexto de Ed. Infantil participou na activadade "Vén coñecer a Celanova de Curros e Celso Emilio". 

Durante toda a xornada e acompañados por Paula Conde e as súas mestras visitaron Vilanova dos Infantes, onde descubriron bonitos recantos e monumentos, como a torre do Homenaxe e a cova de San Vivián para despois coñecer en Celanova o Mosteiro de San Salvador, onde desfrutaron dun contacontos amenizado por música do impresionante órgano.

Tiveron tempo tamén de divetirse nos brinquedos e de pasar unhas horas de gran compañeirismo e moitas aprendizaxes nunha xornada que a ben seguro será difícil de esquecer para tod@s el@s!!!

Nautilus. 20 000 leguas de viaxe submarino

Hoxe, o alumnado de terceiro de EP tivo a oportunidade de asistir á representación de "Nautilus. 20 000 leguas de viaxe submarino".

Gañadora do premio FETEN 2020 á Mellor Proposta Orixinal pola súa sensibilización ambiental, esta posta en escea é unha versión da clásica novela de aventuras de Jules Verne, na que o capitán Nemo se erixe como unha enigmática figura que capitanea un medio de transporte que sorprende o profesor Aronnax e a Conseil, os dous pasaxeiros inesperados. Esta nova proposta da Compañía La Negra presenta unha lectura actual, comprometida e preocupada pola conservación dos océanos e do noso planeta.

Esta actividade entronca perfectamente co PDI do centro para este curso 2022 - 2023 onde traballamos todo o relacionado co mundo da auga e co obxectivo 14 dos ODS que é "conservar e utilizar de xeito máis sostible os océanos, os mares e os recursos mariños".

Completaron a súa xornada de mañá facendo unha viaxe no "Tren Turístico" de Ourense que lles levou a facer un percorrido por toda a cidade dende a Praza Maior ata as Termas de Outariz.

Sen dúbida, unha mañá moi ben aproveitada e chea de aprendizaxes ben diferentes aos do día á día no cole!!

https://www.afundacion.org/es/agenda/evento/escolares-2020-2021.-nautilus

Fotografías: Manuela Vázquez

Coñecemos un pouco mellor o noso barrio

O alumnado de primeiro de Ed. Primaria levou a cabo unha actividade centrada en coñcecer un pouco mellor o barrio do Polígono onde está o noso centro escolar. Mediante pistas e as súas lupas de espías tiñan que atopar os distintos edificios singulares que hai ao noso redor e facer un pequeno traballo de investigación sobre eles. Sen dúbida, unha mañá moi aproveitada e chea de aprendizaxes diferentes!!

Todo ... Rico, rico !!

Que ben volver á Casa da Cultura do Concello de Xinzo de Limia (moitísimas grazas polas facilidades dadas polo persoal da Concellería de Cultura, María e Alfonso, para poder levar a cabo esta actividade) máis de dous anos despois e cunha obra tan divertida como este Saaabor!! da man de Félix Rodríguez e Fran Rei, que nos fixeron pasar unha hora de risas e entretemento!

"Saaabor!, Premio do público  Festiclown 2018,  é un espectáculo cómico que mestura música, maxia, humor, ritmo e participación do público, co mundo da gastronomía de fondo. Os nosos protagonistas convértense en dous recoñecidos chefs que nos ofrecen pratos para todos os gustos: desde a comida máis práctica e sinxela ata a máis elaborada, sen esquecer viño e sobremesa, elaborando un saboroso menú para toda a familia.

Félix Rodríguez é un actor e músico con ampla traxectoria escénica en compañías como Odaiko,  Píscore e Trío  Refugallo, que nesta ocasión compleméntase perfectamente con Fran Rei, cómico que participou en máis de 20 montaxes con compañías como Vos  Sete Magníficos  máis Un,  Pallasos en Rebeldía ou  Acontrabutaca."  https://www.culturactiva.org/es/espectaculo/saaabor

Xuntos crearon este espectáculo, unha receita chea de sabor que fixo as delicias dos padais máis esixentes entre o noso alumnado!

Fotografías: Manuela Vázquez Bouzas

Música: Dj NiFran - Danza Invisible - Sabor de amor

Laboratorio STEAM na casa

# MayoCientÍFIco2020 #SomosCiencia

Achegamos esta iniciativa, que nos chega desde Canarias, con propostas de actividades STEAM para nenos e nenas de Primaria, especialmente de 7 a 9 anos acompañados das súas familias. Preme no enlace      

                                              https://laboratoriosteamencasa.com/

Agardamos que sexa do voso proveito.

Ángel Carracedo 👨🏫 / Lugrís 🎨 / Papiroflexia ✋.. Descubre propostas en #AfundaciónEncasa

A Área Educativa de Afundación proponche un reto: coñecer desde a túa casa a exposición «Lugrís, paredes soñadas» a través dunha visita virtual. Deberás observar, ler e responder ás diferentes fichas de investigación que deseñamos para o teu entretemento. 

ENTRAR NA VISITA VIRTUAL

Papiroflexia en casa. Facemos un corazón.

Jorge Pardo, director da EMOZ (Escola Museo Origami de Zaragoza) e coordiandor da exposición «Papiromates. Matemáticas
+ Creatividade = Papiroflexia», apréndenos a facer figuras básicas con papel.
 

VER RECURSO

Obradoiros de artes plásticas. Creación de pinturas.

Este taller está pensado para os máis pequenos da casa, por iso é sinxelo. Vai dirixido a escolares desde Ed. Infantil ata
3º de EP. Tratamos de orientalos na
creación das cores primarias e como
a partir destas podemos conseguir moitas outras, tomando neste caso unha composición xeométrica como as que
facía Luis Caruncho, que nos pode servir
de inspiración..
 

VER +

Conferencia «Diversidade humana e educación» con Ángel Carracedo.

Ángel Carracedo analiza, desde un punto de vista científico, como o noso sistema educativo perde grandes potenciais e talentos ao empeñarse en facernos iguais. As calidades coas que seleccionamos as persoas son unhas poucas (basicamente memoria e concentración) esquecendo valorar e desenvolver outras moitas, entre elas a creatividade e a curiosidade.
 

VER CONFERENCIA

Reforzamos hábitos saudables

Un ano máis participamos no programa da Fundación Eroski "Coñece o teu súper", onde ademáis de darnos a coñecer a ampla oferta de alimentos saudables que podemos atopar no noso supermercado de barrio, aprendemos cales son bos para a nosa saúde, debendo estar máis presentes na nosa dieta cotiá e cales outros non son tan beneficiosos para nós, comenzando a facer que a súa presenza sexa cada vez máis esporádica.

Da man de Eva, aprendimos a recoñecer distintos alimentos e non so grazas a nosa vista, decatándonos que moitas veces comer "non só polos ollos" tamén é moi importante. 

E como finde festa, un super banquete feito con productos moi saudables cunhas presentacións moi orixinais preparadas polo persoal do supermercado Eroski da carretera de Celanova, que nos demostran que todo o san tamen é moi rico. Moitas gracias a todas elas! 

Alimentación saudable, compoñente básico do noso currículo!

Teatro, ruta cultural e Comisaría de Policía... Non paramos!!

Hoxe, o alumnado de terceiro e cuarto de educación Primaria asistiron á posta en escea de "Nana para un soldado". Esta obra, relata o encontro de dous soldados inimigos no frente, que terán que deixar a un lado as súas diferencias para facerse cargo dun pequeno imprevisto, o nacemento dun neno. Algo tan forte como é a guerra e a morte, e por outro lado, un nacemento, a vida, para facer unha reflexión sobre o absurdo das guerras e o necesario que é entenderse, escoitarse e respectarse.

Con grandes doses de humor e rodeados dun ambiente lírico, Ghazafelhos desenvolve unha das historias que non deixa indiferente a ninguén, e propón unha serie de actividades e recursos para que o profesorado de Educación Primaria utilice para abordar o tema nas aulas, sendo conscientes da necesidade dunha educación para a paz e a non violencia, baseada na igualdade de oportunidades e na diversidade enriquecedora das persoas, así como da eliminación de barreiras e fronteiras, por desgracia, tan de rabiosa actualidade.

Posteriormente, o alumnado de terceiro desprazouse ata a Comisaría da Policía Nacional en Ourense, onde Lorena amosounos toda a instalación e aprendemos un montón de cousas (tocamos o que é a defensa, o chaleco antibalas...) Estivemos no cuarto de reseña, calabozos (onde había dous detidos): teñen audio e cámaras; na oficina de denuncias, na exposición policial e no garaxe. Unha experiencia fantástica!

Por outra banda o alumnado de cuarto fixo un percorrido cultural polo casco histórico da cidade acompañad@s por Jose Ramón, técnico municipal da Oficina de Turismo de Ourense. Camiñamos polas estreitas rúas de Ourense, coñecimos un pouco mellor a Praza Maior, a Catedral e, por suposto, rematamos nas Burgas, emblema da cidade. Contar cunha visita guiada así, foi todo un luxo!

Visitamos a nova Biblioteca "Xeración Nós" de Ourense

Aproveitando a asistencia á representación de "O lobo e a lúa", o alumnado de Educación Infantil foi a coñecer as novas instalacións da nova Biblioteca Pública de Ourense "Xeración Nós", un espazo moi novidoso e con recunchos moi axeitados para est@s nov@s futuros lector@s... Pasaron unha mañá distinta chea de contos e historias marabillosas nun lugar máxico ao que voltar é unha obriga!!

Coñecemos un pouco máis as nosas institucións

Aproveitando o programa "Coñece as túas institucións" da Consellería de Educación, Universidade e Formación Profesional, o alumnado de quinto de Educación Primaria visitou o Edificio Administrativo de San Caetano da Xunta de Galicia e o Parlamento Autonómico en Santiago de Compostela. Temos que agradecer o trato recibido polas persoas que nos acompañaron nestas visitas, que nos explicaron dun xeito moi didáctico o funcionamento destas dúas institucións e respostaron dun xeito moi paciente a todas as cuestións e inquedanzas que lle propuxo o noso alumnado.

Aproveitamos a xornada para visitar tamén o Centro Galego de Arte Contemporánea, onde vistamos as dúas exposicións que a día de hoxe están alí presentes,  Museo (do ermitán) Man e "Crebas" de Francesc Torres. Despois fixemos un taller moi dinámico e interesante sobre o aproveitamento das "crebas" (todo aquel material de refugallo que o mar devolve ás nosas costas) fío conductor, tamén, das dúas exposicións que visitamos, cocienciándonos da importancia do coidado do noso medio natural.

En resumo, un día intenso, cheo de vivencias e aprendizaxes que enriqueceron, sen dúbida, o vagaxe vital do noso alumnado.

Traballamos valores de igualdade... e buscamos a lúa!

Hoxe o alumnado de Educación Infantil, 1º e 2º de Educación Primaria desprazouse, acompañado polo profesorado do centro, ata o Auditorio da Casa da Cultura de Xinzo de Limia para asistir á obra de monicreques "Ú-la lúa", posta en escea pola Xanela do Maxín.

U-la Lúa? é dunha proposta escénica onde valores como a tenrura, o respecto ou a solidariedade cobran importancia para levarnos a un mundo onde a violencia non ten cabida e a ilusión fai dos soños unha realidade.

Lúa é unha gatiña pequena, algo tímida e asustadiza. Vive coa súa avoa nunha humilde casa. No exterior contan cun fermoso xardín no que Lúa pasa as horas xogando soa. Non ten irmáns e a avoa lle deixa saír fóra, mais Lúa soña con viaxar, coñecer novos lugares e ter amigas e amigos para xogar.

Unha mañá chea de aprendizaxes e diversión!!