Feliz Día do Libro!

 “Aprender a ler é acender un lume, cada sílaba que se deletrea é unha faísca.” Victor Hugo, escritor francés.

Chega unha das actividades máis esperadas do curso!

O amadriñamento/apadriñamento lector enche o noso cole de libros compartidos polo alumnado dos distintos cursos. Unha gran oportunidade para convivir e compartir unha experiencia única que ano a ano fai deste Día do Libro unha data especialmente sinalada no noso calendario. Cando lemos, visitamos outros mundos, outras realidades … e que mellor que facelo en moi boa compañía!!!

Coñecer para protexer

 "En cada nena e neno deberíase poñer un cartel que dixese: Tratar con coidado, contén soños." Mirko Badiale, escritor e filósofo italiano.

Dentro das actuacións que levamos a cabo conxuntamente co CDR O Viso e coa Plataforma de Organizacións de Infancia de Galicia (POIG), enmárcase esta charla á que asistiu o noso alumnado de quinto de Educación Primaria.

Na Lei Orgánica de Protección Integral á Infancia e Adolescencia contra a Violencia (LOPIVI) xa menciona que cada centro educativo ten que ter unha/un coordenadora/corrdenador de Protección para escoitar e defender a todo o alumnado e facer do centro educativo un centro seguro. Este rol en todos os centros educativos de Galicia está asumido polo Coordenador/a de Benestar do centro que xunto co equipo ACAE será o que coordine e xestione todas estas situacións.

Na charla impartida no espazo creativo, o noso alumnado identificou situacións de violencia e como responder ante elas, dándolle unha serie de estratexias e buscando sempre o apoio da súa familia primeiro, de todo o profesorado do centro despois así como o dos seus iguais.

Esta é unha formación que dende o noso cole consideramos indispensable e que permite detectar situacións non desexadas entre o noso alumnado e darlle a resposta correcta, contundente e inmediata para atallar dende a raíz calquera tipo de conducat contraria á convivencia.

El Bibliobús de Alce

"O único importante nun libro é o significado que ten para ti." W. Somerset Maugham, escritor británico.

Cando se trata de contar un conto… Ninguén o fai mellor que Alce! Pero unha noite, sentado coa súa familia á calor do lume, a Alce non se lle ocorre nin unha soa historia que non contase xa. Necesita un libro con novos relatos. Ou quizá o que todos necesitan é unha biblioteca...

Este álbum ilustrado infantil convida os pequenos a penetrarse no marabilloso mundo dos libros e das bibliotecas. A través dunha divertida e enxeñosa historia ambientada nun bosque e os animais que viven nel, abórdanse temas como a narración oral de contos, a alfabetización, o pracer da lectura individual e a colectiva ou os libros e a capacidade que teñen de crear lazos entre as persoas. https://www.edelvives.com/es/tienda/el-bibliobus-de-alce

Desta volta a nova PisaCharcas Lucía e Xoán son quen nos amosan como os animais do bosque descobren aos máis pequenos a maxia dos libros e as bibliotecas, lugares que canto máis se visitan, máis nos enganchan. Moitas grazas aos dous por facernos ver a maxia destes lugares!

Unha Travessia polo Mar das Antelas

"Vem navegar com nós!!". A Arca da Noe

Noemí Vázquez é unha capitana de terra adentro onde o rural é surcado polas travesías máis fermosas ateigadas de música, poesía e vida. Ela e a súa Arca, recollen todo tipo de especies merecentes de ser vistas, ouvidas e comunicadas por un único denomidor, o amor á arte, á cultura e ao noso rural. Hoxe tivemos a sorte de por tela entre nós, para contarnos algunhas dos seus desembarcos. Esta muller brava é tamén profesora de Lingua Galega e Portugés na Limia. Tamén poidemos escoitar ás que ademáis forman parte deste fermoso proxecto, as Xilgras Mencía e Noa que nos delitaron cuns cánticos.

Que pracer poder contar con esta rosaliana, protagonista ela tamén das nosas Mulleres da Limia, libro que publicaremos proximamente en colaboración coa ANPA do noso cole e o CDR O Viso.

Moitas grazas, Noe, por facer o que fas e ser como es!!

Chocolata

"A humanidade ten ilusións como o paxaro ás. Iso é o que a sostén." Blaise Pascal, científico, filósofo e escritor francés.

Chocolata toma o seu baño diario na lagoa. Un día decátase de que na cidade hai unha casa de baños, e decide saír da selva coa intención de probalos. Para non parecer tan salvaxe, cómprase un chándal e unhas zapatillas deportivas con lucecitas, disposta a coñecer a vida na cidade. Ao chegar á capital, Chocolata fai unha rápida incursión nos hábitos urbanos máis tópicos, actuais e recoñecibles desde a mirada infantil, e experimenta outro estilo de vida.Neste relato, Marisa Núñez fala sobre as ilusións, os desexos, a amizade e a importancia da experiencia e de valorar o que temos ao noso ao redor. A ilustración, con inspiración africana, é alegre e colorista; expresa con mestría diferentes perfís humanos a través dos animais da selva, e reflicte o humor e o optimismo da narración. Ademais, Helga Bansch enriquece o relato creando personaxes que conduce hábilmente a través das páxinas, para darlle un sentido máis amplo á viaxe de Chocolata, que o lector deberá descubrir a través da lectura das imaxes. Un álbum no que o texto e a ilustración enténdense e compleméntanse de tal modo que unha lectura sen imaxes evocaríanos unha historia diferente. https://oqo.es/product/chocolata/

A  nosa nova #PisaCharcas Uxía, acompañada de Ana, trouxeron ata a nosa Biblioteca Escolar a historia desta valente "hipopótama", que non conformándose co que ten ao seu redor, decide arriscar e facer valer as súas ilusións por descubrir lugares e situacións novos para ela.

Encántanos recibir visitas como esta no noso cole!

Non hai dificultades que non se poidan superar

 “A fotografía é o medio adecuado para recrear o agora, o mundo vivo dos nosos días.” Berenice Abbott, fotógrafa estadounidense.

Seguen a achegarse ata o noso centro as Mulleres da Limia que serán as protagonistas do libro que publicaremos en colaboración coa ANPA do noso cole e o CDR O Viso.

Desta volta foi Mati, a eterna fotógrafa de Xinzo de Limia, que non temos ningunha dúbida que  é unha muller brava que sorteou diferentes obstáculos na súa traxectoria como muller emprendedora e empresaria, como o idioma na emigración, a crianza e a posta en marcha do que foi o seu negocio e forma de vida, totalmente soa.

De entre todos os retratos que o alumnado de sexto B preparou para ela, Mati foi a que escolleu o que aparecerá próximamente na nosa publicación.

Referentes como Mati son os que pretendemos ensinar ao noso alumnado para que sexan quen de decatarse de que só con esforzo, dedicación e moitos, moitos sacrificios, todo na vida pode saír adiante.

Los tres cerditos

"Un bo conto débeche deixar con moitas experiencias e algo esgotado ao final. Vives varias vidas ao ler!." William Styron, novelista estadounidense

Tempo para os contos clásicos no noso Patio das Bolboretas. Desta volta Dylan e Soralla achéganos esta fábula de tradición oral onde os seus protagonistas, os tres porquiños,  retratan os valores do esforzo, a constancia, o traballo, a responsabilidade e a lealdade entre os irmáns para conseguir os seus obxectivos.

Frases como  "soplaré, soplaré y tu casa derribaré" son xa parte dos máis antigos dos recordos  da nosa máis temperá infancia e non ten habido casa onde esta e outras historias formen parte do inventario de contos "de sempre".

Moitas grazas Soralla por ese fermoso estoxo con pinturas que lle regalaches a tod@s @s compis de Dylan e  por unirte ao noso clube de #PisaCharcas da nosa Biblioteca Escolar!

Da supervivencia á prosperidade...

«A sociedade ten que aceptar que non todos poden ser iguais.» – Albert Einstein

Nas Nacións Unidas celebramos este día co obxectivo de reafirmar e promover a plena realización de todos os dereitos humanos e liberdades fundamentais das persoas autistas en igualdade de condicións coas demais. Conseguíronse grandes progresos, sobre todo grazas á contribución dos numerosos e incribles defensores dos autistas que traballan incansablemente para difundir as experiencias vividas das persoas autistas en todo o mundo.

Cando en 2007 a Asemblea Xeral da ONU designou o 2 de abril como Día Mundial de Concienciación sobre o Autismo facía fincapé na súa resolución A/RES/62/139 na importancia de sensibilizar á pública sobre o autismo. Dezasete anos despois, xa non se trata só de concienciar á opinión pública, senón de promover a aceptación e o aprecio das persoas autistas e da súa contribución á sociedade. https://www.un.org/es/observances/autism-day

Para conmemorar esta data tan significativa no noso centro levamos a cabo unha serie de actividades para tomar concienciación entre todo o alumnado da importancia da inclusión como elemento de identidade do noso cole, facendo fincapé nas persoas cun espectro autista , nas súas expectativas, tanto persoais como profesionais e nos seus retos na súa vida cotiá.

De que cor é un bico?

 "Un bico fai que o corazón volva ser novo e borre os anos". Rupert Brooke, poeta inglés.

A Minimoni encántalle pintar mil cousas de cores: xoaniñas vermellas, ceos azuis, plátanos amarelos... pero nunca pintou un bico. De que cor será? Vermello coma unha deliciosa salsa de tomate? Non, porque tamén é a cor de cando estás enfadado... Será verde coma os crocodilos, que sempre lle pareceron tan simpáticos? Imposible, porque é a cor das verduras, e non lle gusta comelas! Como podería pescudar de que cor é un bico? https://www.casadellibro.com/libro-de-que-cor-e-un-bico/9788491420590/5205225

Manuel e Laura achegaron ata a nosa BE esta fermosa historia de Rocío Bonilla que recibiu o Premio do Ministerio de Cultura e Educación aos libros mellor editados do 2015. Nela, a protagonista intenta averiguar como pintar eses bicos que a tod@s tanto nos gustan, buscando referencias en cousas e cores que ten ao seu redor na vida cotiá... Chegará a unha resposta que lle convenza?

Para nós foi todo un pracer recibir a esta nova #PisaCharcas no noso cole!

Convencemento, práctica e ilusión

"Unha ilusión eterna, ou polo menos que renace a miúdo na alma humana, está moi preto de ser unha realidade." André Maurois,  novelista e ensaísta francés.

Os rapaces de terceiro querían saber que hai detrás dunha muller que leva dedicándolle a música moito tempo da súa vida e Esmeralda Marra foi moi clara: convencemento, práctica e ilusión. Dende aquel primeiro acordeón que lle mercara seu pai ata ensinar na actualidade aos nenos e nenas de Xinzo a tocar o saxofón, pasaron polo medio moitas notas musicais, horas de ensaios, melodías de música “movida” que é a que a ela lle gusta tocar e algunha que outra primeira vez. Quizais hoxe non pareza raro tocar nunha banda pero daquela era ben diferente. A maxia da música vaite atrapando lentamente e unha vez dentro .. xa non es quen de escapar. Esmeralda animounos a todos a probar e de seguro que para o ano xa teremos algún novo ou nova saxofonista apuntado no conservatorio.

Esta visita está enmarcada na actividade "Mulleres da Limia", coorganizada polo noso centro, a nosa ANPA e o CDR O Viso, que tenta dar  visibilidade a unha selección de figuras femininas relevantes da nosa comarca. Con estas visitas pretendemos que o noso alumnado coñeza da man das súas protagonistas todos os esforzos e circunstancias vitais que tiveron que afrontar para acadar os seus obxectivos. O produto final deste traballo será a edición dun libro onde figurarán todas esas experiencias e os retratos das protagonistas feitas polo alumnado do noso centro.

La granja de Abraham

 "A lectura é un tícket de desconto a todas partes." Maria Schmich, xornalista estadounidense

Hoxe veu ao noso Patio das Bolboretas María José, que xunto a María, contaron o seu conto favorito, "A granja de Abraham", onde puideron aprender que come cada animal desta particular granxa e que sonido fai cada un deles, sempre dun xeito orixinal e moi divertido.

María José contounos que este é o conto de Abraham, o irmán de María, e que ela nunca se cansa de escoitar!!

Esta fabulosa #PisaCharcas tamén agasoullou a toda a clase cuns marabillosos marcapáxinas feitos por elas as dúas!

La casa de Tomasa

"Un libro é un soño que vostede ten nas súas mans." Neil Gaiman, escritor inglés.

Neste conto coñeceremos a Tomasa, unha nena moi habilidosa que decide construír unha linda casiña para ela e o seu gato. Cando se decatan os seus amigos acoden a ela e Tomasa ten que ir ampliando a súa casa con todo o que os recentemente chegados necesitan. A casa cada vez está máis chea e hai menos espazo para ela e o seu gato. Converteuse   nunha especie de comuna tola e divertida ….Queres saber como o remedia Tomasa? https://bibliobreton.blogspot.com/2015/07/la-casa-de-tomasa.html

Zara e Manuel levaron ata a nosa Biblioteca Escolar esta divertidísima historia de Phyllis Root e Delphine Durand onde os desplegables e os "pop-ups" son case tan protagonistas como os propios personaxes deste conto. 

Temos un novo membro da nosa tribu de #PisaCharcas, que estamos seguros que en vindeiras edicións desta iniciativa volveremos a contar con el!

No camiño da inclusión, tod@s compatimos viaxe

 "Creo que un heroe é un individuo común que atopa a forza para perseverar e resistir a pesar de obstáculos abafadores." Christopher Reeve, actor norteamericano que encarnou a Superman

Conmemoramos hoxe, como cada 21 de marzo, o Día Mundial da Síndrome de Down, dando visibilidade a estas persoas extraordinarias xa que como Pujolas y Lago afirma "en una escuela inclusiva sólo hay alumnos, a secas, sin adjetivos; no hay alumnos corrientes y alumnos especiales, simplemente alumnos, cada uno con sus propias características y necesidades. La diversidad es un hecho natural, es la normalidad: lo más normal es que seamos diferentes. ¿Qué podemos hacer para todos los alumnos, que son diversa, para que todos aprendan al máximo de sus posibilidades?" https://www.sindromedown.net/creamos-inclusion/educacion/educacion-inclusiva/

A inclusión é, sen dúbida, un dos sinais de idade do noso centro educativo e traballamos día a día para traballar toda esa diversidade presente nas nosas aulas e que precisan dunha atención especial.

Hoxe quixemos poñer en valor esa variedade nas características do noso alumnado traballando e coñecendo un pouco mellor ás persoas que presentan esta diferenza cromosómica e dando visibilidade a través deste "photocall" a "autenticidade" destas persoas.

O noso alumnado de sexto de Educación Primaria tivo a sorte de contar coa visita de Xiana, irma de Noa, exalumna do centro e que continúa os seus estudos no ciclo de cociña do IES Lagoa de Antela. Fixéronlle un montón de preguntas e viron como é o día a día desta compañeira #extracapacitada. Para el@s non é nada novo, xa que conviven día a día coa nosa fantástica Tati, intercambiando experiencias de convivencia e inclusión no seu quefacer diario.

#DíadaNarraciónOral. Contos para nunca esquecer!

“Os detalles son a esencia dunha boa narración… e dunha vida ben exposta.”  César Fernández García, escritor español.

Cada 20 de marzo conmemoramos en todo o mundo o  #DíadaNarraciónOral, onde queremos poñer en valor a transmisión oral desas historias que forman parte do noso patrimonio inmaterial como son os contos e fábulas populares. Ese traspaso de xeración en xeración garante a súa viveza e continuidade no tempo.

Hoxe tivemos a grande sorte de poder contar no cole co avó de Icía e Antón. Benito foi quen lles contou a el@s e ás súas compañeiras e compañeiros unha chea de historias onde raposas, cegoñas, aves rapaces, cárabos, lobos, ferreiros, ... e outros moitos personaxes  son os protagonistas de fermosas fábulas onde sempre hai unha ensinanza agochada e un punto de humor. 

E para rematar o alumnado de cuarto de primaria preguntaronlle  pola súa infancia, os seus xoguetes favoritos, como os construía, como era daquelas ir ao cole, que estudaban... e unha morea máis de cuestións que Benito respostou cun grande agarimo e dando unha chea de detalles que o noso alumnado seguro que non esquecerá! 

Moitas grazas por acompañarnos esta mañá e converterse nun novo #PisaCharcas do noso centro!

Unha chea de historias con Uxía Morán

" Maruxa cosía, varría e labraba. Benito cantaba, folgaba e durmía. Mais un día..." "Maruxa" - Eva Mejuto

Actriz de teatro e cine, presentadora en galas benéficas e festivais e contacontos, entre outras moitísimas facetas profesionais, Uxía Morán trouxo ata o noso cole unha escolma de fermosísimas historias, tales como “Guapa”, “Maruxa” ou “Ricitos de oso”, entre outras,    nas que  os distintos personaxes, falando sempre en clave de humor, loitan  contra as convencións sociais e os xéneros establecidos.

Todo o alumnado de Educación Infantil e de primeiro e segundo de Educación Primaria puido gozar co bo facer e coa posta en escena  de Uxía, traballando sobre a igualdade, o respecto ás demais persoas, a autoestima e outros moitos valores moi presentes no noso quefacer diario dentro e fóra da escola.

Unha mañá, sen dúbida, chea de aprendizaxes moi significativos e relevantes dentro do amplo currículo que o noso cole transmite ao seu alumnado.

Arrancan os proxectos de ciencia!

 "Mira profundamente na natureza e entón comprenderás todo mellor." Albert Einstein, matemático e físico alemán

Englobado no seu proxecto  "Gota a gota, a auga", o noso alumnado de Primeiro de Educación Primaria comezaron as súas experiencias con sementes. Irán comprobando, empregando o procedemento científico, a importancia que a auga ten  para todos os seres vivos. Plantaron distintas sementes en algodón e en terra. Irán observando a súa evolución completando unha táboa de recollida de datos. 

Aprendizaxes significativos baseados na experiencia propia e a observación directa. Seguro que deste xeito afianzan competencias básicas no ambito das ciencias naturais.

Imos á feira!

“Un pobo sen tradición é un pobo sen porvir.” Alberto Lleras Camargo xornalista e estadista colombiano

Dentro do seu proxecto relacionado co estudo das tradicións e o coñecemento do máis próximo, o noso alumnado de catro anos visitou hoxe, 14 de marzo, unha das feiras mensuais que temos na nosa vila.

Alí coñeceron de primeira man todo tipo de postos de venda, levantando entre os visitantes unha gran expectación, recollida nos medios de comunicación local. https://www.facebook.com/share/VTfWcYkLEm2U3rys/

Para rematar esta xornada tan especial, mercaron churros e cun riquísimo chocolate "merendaron" no Parque do Toural, onde despois pasaron un moi bo rato, "enredando" con todos os brinquedos que alí hai....

Unha mañá distinta aprendendo no propio entorno, próximo e familiar!

Que rico e que ben pinta este chocolate!!!

 "A nove de cada dez persoas gústalles o chocolate. A décima persoa sempre minte." John Q. Tulio

Hoxe, o noso alumnado de tres anos tivo unha "merenda" moi especial... que resultou ser todo un éxito. Aproveitaron a celebración da feira en Xinzo pra facerse cunha moi boa provisión de churros e as profes tamén trouxeron froita para facer unha mistura deliciosa cun riquísimo chocolate.

Pero non podían desaproveitar ese recurso para manifestar as súas dotes artísticas con ese "preciado material". Podedes comprobar todo o que fixeron... e seguró que os seus mandilóns tamén foron boa proba diso!

Foi unha mañá chea de aprendizaxes e diversión... seguro que repiten!!!

El monstruo de colores

 «Se deixas saír os teus medos terás máis espazo para vivir os teus soños». Marilyn Monroe, actriz estadounidense.

O Monstruo de Cores non sabe que lle pasa. Fíxose unha lea coas emocións e agora tócalle desfacer o envurullo. Unha historia sinxela e divertida, que introducirá a pequenos e a maiores na fascinante linguaxe das emocións. http://www.annallenas.com/ilustracion-editorial/el-monstruo-de-colores.html

Que difícil é saber ás veces como te sintes.... Este fermoso conto que nos trouxeron ata a nosa Biblioteca Escolar Fiorella e Rosa, pode axudarnos moito a entender como son as emocións e como podemos manexalas.

Moitas grazas ás dúas. Xa es unha #PisaCharcas máis do noso cole!!!

Hugo: Empatía, diversidade, a beleza de sermos diferentes.

"A inclusión non é só un termo, é un compromiso diario de aceptación e respecto pola diversidade."  Stella Young, comediante australiana, xornalista e activista dos dereitos da discapacidade

Gañadora do Premio María Casares ao mellor espectáculo para o público infantil e familiar no ano 2022. Hugo conta a historia dun neno que é diferente. Gústanlle moito os avións e tamén toca o piano. Laia visita a Hugo cada día. A Laia gústalle falar e gústanlle as plantas. Hugo ten TEA.

Unha peza teatral que aborda o tema do trastorno do espectro autista na infancia, chea de sensibilidade e empatía, que fala da diversidade, da convivencia e da beleza de sermos diferentes. https://escolares.afundacion.org/actividad/hugo/

Esta obra presenta valores que son chave dentro do noso Proxecto Educativo de Centro, onde a inclusión e a atención á diversidade son algunhas das bases sobre as que construímos o noso quefacer diario. 

O noso alumnado complementou esta xornada cunha visita didáctica á cidade de Ourense, identificando os principais monumentos e lugares de interese, como son As Burgas, o edificio do Concello, a Catedral e o Xardín Botánico.

Daniela Pirata

 “A lectura dun bo libro é un diálogo incesante, en que o libro fala, e a alma contesta”.

André Maurois, escritor francés

Daniela soña con ser pirata no Caimán Negro. Pero Orejacortada e os seus piratas non parecen moi contentos coa idea. Daniela terá que pasar difíciles probas. Pero, e se estes piratas non queren mozas no seu barco? https://www.casadellibro.com/libro-daniela-pirata/9788417123116/5869815

Lucas e Kenia preséntanos esta historia que rompe cos estereotipos de xénero e que nos serve para educar na igualdade. Transmite o valor de loitar polos nosos soños a pesar do que poidan dicir ou pensar os demais.

Valores que son sinais de identidade do noso centro e que inculcamos no noso alumnado no traballo do día a día.

Segunda visita á nosa Biblioteca Escolar de Kenia. Nós, encantad@s de recibila e agradecerlle este tempo que sempre nos dedica!!

A casa da mosca chosca

"Es o dono da túa vida e as túas emocións, nunca o esquezas. Para ben e para mal." O Principiño

Farta de zoar dun lugar a outro, a mosca chosca decidiu facer unha casa e convidar os animais do bosque. Fixo un pastel de amoras, colocou sete banquetas e sete pratos na mesa. E, co arredendo da torta, foron aparecendo, do máis pequerrecho ao máis grande, sete estraños personaxes. Non cabía ningún mais, e sen embargo...  https://www.casadellibro.com/libro-a-casa-da-mosca-chosca/9788484641551/828450

Un conto cheo de intriga e no que, utilizando cores “explosivas, case fluorescentes”, Sergio Mora crea unhas criaturas extravagantes, de aspecto transgresor, con moito humor e expresividade.

Un conto acumulativo que invita ao xogo fonético; unha historia para ler e contar, que medra en intensidade ao paso de cada páxina ata chegar a un final sorprendente.

Iria e Tita excolleron esta historia para que as súas compañeiras e compañeiros puideran sentir verdadeiros calafríos e pasar un rato ben divertido!!

Benvida e moitas grazas, Tita! Xa es unha PisaCharcas máis!

Que pegada queres deixar?

"Loita polas cousas que che importan, pero faino dunha maneira que leve a outros a unirse a ti." Ruth Bader Ginsburg, 2ªmuller xuíz da Corte Suprema dos EUA

Conmemoramos o Día Internacional da Muller neste 8M con actividades moi diversas nos distintos cursos de Educación Infantil e Primaria. Elaboración de pulseiras con slóganes referidos a esta data, recoller a prezenza das mulleres na prensa, pequenas pancartas e carteis con adxectivos relacionados co empoderamento feminino, lecturas de escritoras senlleiras na nosa lingua, investigación sobre a vida de distintas profesionais moi relevantes en ámbitos moi diversos da nosa sociedade, representacións teatrais, ... e outras moitas que tiñan como único obxectivo dar visibilidade a todas as mulleres neste día de reinvidicación en feminino.

Tamén pedimos a colaboración da nosa Comunidade Escolar para facer un diorama cos zapatos das mulleres importantes na vida do noso alumnado. Cada un deles representa o esforzo e a pegada de avoas, nais, tías, irmáns, curmáns, amigas, ... que deixan nas nenas e nos nenos do noso cole cada día e a forza representada por eses fíos morados que todas elas xuntas fan!

Fixémonos a pregunta de que pegada queresmos deixar cada unha/un de nós.... Princesa ou Loitadora... e estamos segur@s que co rol fundamental que ten a educación neste e en tantos outros ámbiitos da vida, cada día conseguiremos ese reto "dunha formación integral que permita ás nenas e nenos unha formación plena e que axude a configurar a súa identidade, así como construír unha concepción da realidade que integre á vez o coñecemento e a valoración ética e moral da mesma.

Educar en igualdade quere dicir educar sen diferenciar as mensaxes en función do sexo, e educar baixo valores coma respeto cara aos demáis."   https://igualdade.xunta.gal/gl/construindo-igualdade

Caca en el zoo

"Os libros son o avión, o tren e o camiño. Son o destino e a viaxe. Son o fogar." Anna Quindlen, escritora e periodista norteamericana,

Alerta! O mozo Bob, gardián do zoo e encargado de recoller os excrementos de todos os animais, atopou a caca máis estraña do mundo. Brilla con luz propia! Que raro!

Será unha caca extraterrestre? Expertos interesados virán de todos lados para descubrir o que ocorre neste curioso zoo.

Unha nova historia de Steve Smallman, con tradución de Begoña Oro, que ten todos os ingredientes para triunfar: un zoo, unha chea de cacas e textos rimados con moita graza, que pode saír mal? https://www.casadellibro.com/libro-caca-en-el-zoo-bob-espinaca-y-la-maravillosa-caca/9788448861032/12884055

Que historia tan curiosa e tan distinta! Mauro e Kenia foron quen de levar a tod@s @s compañeir@s da súa clase ata este zoo tan particular e resolver todos os misterios que este conto ten.  E levaron "atrezzo" para tod@s!! Non o poideron pasar mellor!!!

Moitas grazas os dous por enrolarse nesta nosa tripulación de PisaCharcas do noso cole. Seguro que hai segunda parte!!

A que sabe a lúa?

 “Eu sei moi poucas cousas, é verdade. Pero durmíronme con todos os contos... E sei todos os contos.” León Felipe, poeta español

Había moito tempo que os animais andaban a matinar a que sabía a lúa. Era doce ou salgada? Só querían probar un anaco pequeno. Polas noites, miraban ansiosos para o ceo. Estarricábanse e estiraban o pescozo, as pernas e os brazos, tentando collela...  Quen non soñou algunha vez con darlle unha dentada á lúa? Este foi precisamente o desexo dos animais deste conto. Tan só querían probar un anaquiño pero, por máis que se estiraban, non eran quen de tocala. Daquela, a tartaruga tivo unha idea xenial: Se sobes ao meu lombo, poida que cheguemos onda ela?, díxolle ao elefante. https://www.casadellibro.com/libro-a-que-sabe-a-lua/9788484646259/1143659

Hoxe veu ao noso Patio das Bolboretas Noe, a nai de Xabi de 3 anos, a contar esta fermosa historia que fomenta valores como o altruísmo, a amizade, a superación, o esforzo, a solidariedade, a empatía e o traballo en equipo.

Todos eles son sinais de identidade do traballo que día a día tod@s @s mestr@s do noso cole fan, pero que as compañeiras de Educación Infantil traballan dun xeito especial para empezar a poñer as bases para  formar pequenas "persoíñas"... E fan un traballo fantástico!

Moitas grazas Noe e Xabi por contarnos este marabilloso conto que nos recorda día a día que tod@s xunt@s... sempre somos máis e mellores!! Estamos encantad@s de ter unha nova PisaCharcas no noso cole!!!

Que sorte poder conmemorar así o Día d@ Escultor!

“A escultura é a arte da intelixencia.” Pablo Picasso

O 6 de marzo rendemos homenaxe a un dos oficios artísticos de maior relevancia para a arte. Celébrase o Día Internacional do Escultor. Con iso preténdese destacar a estes magníficos creadores de obras artísticas en todo o mundo. Esta data creouse para conmemorar o nacemento do escultor italiano Miguel Ángel Buonarroti. Foi un escultor, pintor, arquitecto e poeta, nacido o 6 de marzo de 1475 en Caprese, Roma. Realizou numerosos proxectos arquitectónicos. A súa escultura máis emblemática é David, a cal se expón en Florencia, Italia.  https://www.diainternacionalde.com/ficha/dia-internacional-escultor

Neste día dedicado a todas as escultoras e a todos os escultores temos que destacar a Xosé Lois Carreira, nado en Parada de Ribeira, pai de ex alumn@s do noso cole e gran colaborador sempre que o chamamos, abusando da nosa confianza con el, para que lle explique ao noso alumnado como traballa, como se inspira, como lle falan as pedras, ... e sempre o fai cun trato moi agarimoso con tod@s el@s. 

Desta volta foi o alumnado de quinto de Educación Infantil quen tivo a grande sorte de recibir ao autor de Limuhé, a nosa Dama da Lagoa, para complementar á actividade que realizaron fai días visitando esta estatua, a Torre de Pena e A Pedra Alta da Limia.

(https://charcalibros.blogspot.com/2024/02/iniciando-nosa-aventura.html)

Unha mañá de convivencia e de aprendizaxes co noso máis destacado escultor que nos lembrou a importancia de facer o que a un/unha máis lle gusta e poñer todo o esforzo posible en conseguilo. Moitas grazas, Xosé Lois!!

"A Muriel custáballe prender no sono..."

"Un libro é un soño que vostede ten nas súas mans." Neil Gaiman, escritor inglés.

"Muriel e o inseparable raposo Blim viven unha calma apracible no seu castelo. Apenas reciben cartas e botan en falta os atafegos doutra época. Mais todo muda logo dun lixeiro estrondo no laboratorio. A maxia e a ilusión envólveos por completo e involúcraos nunha misión fermosa e entrañable que, ademais, lles abrirá as portas da sospeita. Serán quen, os dous compañeiros, de desentrañar o misterio que hai tempo os intriga? Non hai elección: sube ao carro de leiteiro e... boa viaxe!" https://www.xerais.gal/libro/de-9-anos-en-diante/muriel-caos-no-laboratorio-lacteo-maria-canosa-9788411103855/

Tivemos a sorte de contar hoxe na nosa Biblioteca Escolar coa presenza de María Canosa (Cee, 1978), enxeñeira de Camiños, Canais e Portos, profesión que leva compartindo desde sempre coa de escritora,  para que nos viñera a falar da nova aventura de Muriel: Caos no laboratorio lácteo, publicada no 2023, ao noso alumnado de 4º de Ed. Primaria que ten este título dentro do seu itinerario lector.

Foron moitas as preguntas e curiosidades que lle fixeron a María e que ela, coma sempre, respostou con toda a súa simpatía e afinidade que ten coas nenas e cos nenos do noso cole. 

Como non podía ser doutro xeito, esta actividade rematou coa sinatura dos seus exemplares e coas adicatorias que o noso alumnado gardará como un recordo perdurable no tempo.

PumpTrack en Monterrei

“Se tes confianza, tes paciencia. A confianza é todo”. Ilie Nastase, xogador de tenis

Dentro do Programa XOGADE da Secretaría Xeral para o Deporte da Xunta de Galicia, o noso centro foi un dos escollidos para realizar a actividade de promoción do PumpTrack 2024 no Complexo Deportivo de Monterrei no Pereiro de Aguiar, organizado polo Servizo Provincial de Deportes de Ourense.

Foi unha mañá onde o noso alumnado tomou contacto co BTT nesta nova especialidade que tanto éxito está tendo entre o público máis novo. Destacar a implicación das mestras (Ana Morais e Ana Alonso) na organización e participación da mesma e que diante dos pequenos atrancos de material e disposición que foron apareceron, só con esa boa vontade e compromiso por parte delas, tivo como resultado unha mañá chea  diversión e aprendizaxe!

Era unha vez un corno de unicornio...

 "Hai máis tesouros nos libros que en todo o botín da Illa do Tesouro."  Walt Disney.

Todo empezou unha vez nun bosque máxico onde unha neniña chamada Xulia descubriu uns cabaliños que intentaban aprender a voar. Ela observou que un dos cabaliños estaba moi triste e non era capaz de voar nadiña de nada. Así que a Xulia ocorréuselle unha maneira divertida e un tanto excéntrica de facer que o seu novo amigo aprendese a voar. Queres saber que foi o que se lle ocorreu?   https://www.casadellibro.com/libro-era-unha-vez-un-corno-de-unicornio/9788494186097/10073032

Hoxe Karla veu á nosa Charca dos Libros a contarlle a Khloe e a toda a súa clase que lle ocorreu a Xulia e, a verdade, foi que todas e todos quedaron encantados con esta fermosa historia. Marcharon cun agasallo que con tanto agarimo preparou para cada un del@s e ela levouse o noso primeiro recordo como PisaCharcas do cole... 

Anímaste a vir contar a historia favorita da túa filla/fillo? Neste enlace recordamos como podes facelo... https://charcalibros.blogspot.com/2024/02/eu-son-unhaun-pisacharcas.html

Iniciando a nosa aventura

 "Caminante, no hay camino, se hace camino al andar". ~A. Machado ~

O noso alumnado de 5º de Ed. Infantil decidiron pórse en marcha para vivir en primeira persoa e aprender "in situ" todo sobre os monumentos da nosa vila.

Coa Dama da Lagoa, Torre de Pena e a Pedra Alta inician o seu propio camiño sumando e compartindo experiencias, vivenzas e aventuras.

Quedamos con ganas de repetir outras andanzas coma esta!!

Lendo etiquetas para coidar da miña saúde

 “Só hai un medio para manter en pé unha sociedade libre e é manter ao público informado.” Joseph Pulitzer

Sabemos o que comemos? Somos capaces de ler as etiquetas e distinguir relamente o que estamos a consumir? Coñecemos realmente a cantidade de azúcares e outros compoñenetes nocivos para a nosa saúde que están presentes na maioría de bebidas e bollería industrial que comemos día a día?

As resposta a estas e outras moitas pregunta foron o obxecto do obradoiro que o Grupo de Innovación Docente “Aliméntate con Ciencia e Conciencia” formado dentro da Universidade de Vigo impartiu ao noso alumnado de 2º,4º e 6º durante o día de hoxe.

"Estímase que 2000 millóns de persoas en todo o mundo teñen sobrepeso ou son obesas e o 40,6 % da poboación infantil española ten exceso de peso (Estudio Aladino, 2019). A obesidade relaciónase cun maior risco de padecer distintas enfermidades (cardiovasculares, diabetes, etc.) que afectan a calidade de vida das persoas e ao seu benestar. Unha alimentación sa e saudable pode axudar a combater a obesidade. Malia todo, a poboación non ten demasiada formación en temas alimentarios e nutricionais. Para facer unha compra axeitada ás nosas necesidades nutricionais é prioritario ler e entender a información alimentaria que se amosa na etiqueta dos alimentos envasados. Unha correcta comparación do etiquetado nutricional e da lista de ingredientes entre alimentos similares é imprescindible para implantar hábitos saudables e escoller aqueles alimentos que presenten un menor contido de sal, azucre e graxas saturadas e/ou un maior contido en fibra, e graxas mono- e poliinsaturadas.

Co gallo de dar unha resposta a esta necesidade social, no ano 2022 creamos na Universidade de Vigo o Grupo de Innovación Docente “Aliméntate con Ciencia e Conciencia”, o cal pretende acercar o coñecemento en materia alimentaria ao alumnado, universitario e preuniversitario, formándoos como consumidores e desenvolvendo un espírito activo na promoción da súa saúde. Para iso:

• Estamos a elaborar materiais divulgativos (podcasts, píldoras de aprendizaxe e vídeos) que se distribuirán entre o alumnado.
• A maiores, puxemos en marcha o Proxecto de Innovación Educativa en Aprendizaxe-Servizo (Aps): Lendo etiquetas para coidar da miña saúde no que participan os nosos alumnos do Grao en Ciencia e Tecnoloxía dos Alimentos e os centros educativos de educación primaria da contorna. Mediante a súa participación voluntaria, o noso alumnado adquire competencias transversais da titulación e outras específicas, pon en práctica os coñecementos adquiridos, e desenvolve habilidades e actitudes mediante un servizo á comunidade."

https://foodandhealthomics.es/grupo-innovacion-docente

Unha mañá chea de aprendizaxes significativos e relacionados cos ODS, especialmante co ODS 3 Saúde e Benestar,  que fan que a partir de hoxe todo o nos alumnado sexa quen de saber realmente o que están a consumir e sexa competente para racionalizar o consumo destes azúcares nocivos para a súa saúde.

300.000 grazas!!!

"Sempre imaxinei que o Paraíso sería algún tipo de biblioteca". Jorge Luis Borges

Arrancabamos alá polo ano 2009 (fai 15 anos xa...) con toda a ilusión do mundo, despois de levar a cabo unha renovación total na Biblioteca do noso cole. Un espurgo de títulos,  un cambio de localización,  buscar un nome e unha mascota atractiva para si, a incorporación ao Plan de Mellora de Bibliotecas Escolares (PLAMBE) da Consellería de Educación.... obxectivo tras obxectivo acadado cun grupo de mestras e mestres (queremos acordarnos especialmente de Toño, de María Cerradelo, de Ana Cid, de Pepa ... e de tant@s outr@s que lle dedicaron horas e horas a este marabilloso proxecto) moi implicado e coincienciado no rol que a Biblioteca Escolar tiña que ter na vida cotiá do noso centro escolar. 

Non só viña o alumnado a buscar libros e a ler contos  se non que tamén toda a comunidade escolar  participaba na creación de materiais audiovisuais,  en facer traballos de investigación e  formación bibliográfica,  falar do seu libro favorito, lerlle historias a outros grupos de alumnado.... e tantas e tantas outras actividades que convertiron a nosa Charca nun punto de encontro para a todos nós. 

E este Blog sempre estivo aí! Para ser testigo e notario de todas esas actividades que se foron facendo e que cada ver abarcaban máis aspectos da vida escolar: Deporte Escolar, Animación á lectura, ANPA, Robótica, Voz Natura, Espazo Creativo, ... e moitos máis que están por chegar.

Mil trescentas cincuenta e unha (1351) entradas nestes quince (15) anos de vida, e trescentas mil (300.000) visitas de tod@s vós que estades pendentes deste humilde cartafol escolar onde saber algo máis do cole de tod@s nós... do Rosalía!

Que feira rapaza / se cantas faremos ...

"Eu son libre. Nada pode deter a marcha dos meus pensamentos, e eles son a lei que rexe o meu destino” Rosalía de Castro | 1837-1885

23 de Febreiro. Día de Rosalía de Castro. Todo o noso centro está cheo de recunchos e lugares máxicos onde a escritora de Padrón é a verdadeira protagonista, como non podía ser doutro xeito.

Durante toda esta xornada foi Rosalía quen encheu as nosas aulas con poemas, cancións, debuxos e tantas e tantas expresións artísticas que non fixeron outra cousa que recordarnos a cada momento á máis gran figura da nosa literatura que Galicia ten.

Baixo o título "Ti es especial por...", este ano o noso EDLG fixo unha proposta de expresión da azimade. Cada alumna e alumno do centro escollería á súa amiga/o e diríalle que é que atopa "singular" nela ou nel.... Un fermoso florilexio de misivas que chegaron ás súas destinatarias/os cun fermoso poema da autora de Padrón e un gran corazón na súa portada!

Un ano máis enchemos as rúas de cor!

 "O tempo que se goza é o verdadeiro tempo vivido." Jorge Bucay, escritor argentino

Nin a chuvia pode con nós! Cunha semana de retraso todo o traballo levado a cabo por familias e profesorado para preparar este gran Desfile Infantil de Entroido veu  o seu resultado polas rúas ateigadas de xente da nosa vila que nos acompañou por todo o percorrido, feito que é salientable para recoñecer, sendo un día laborable!

Queremos dar as grazas a todos os centros de ensino da zona da Limia participantes por facer ese gran esforzo de desprazarse cos seus propios medios para facer, aínda se cabe, máis grande esta data tan sinalada na nosa festa máis importante do ano. Destacar a gran acollida e a perfecta organización coa que o CEIP Carlos Casares nos recibiu para, despois dun gran desfile, poder recuperar folgos cun chocolatiño quente e bica a esgalla!

Agradecer igualmente ao Concello de Xinzo de Limia, Policía Local, Protección Civil e á Asociación A Pantalla polo seu papel imprescindible para que a xornada se desenvolvese con toda normalidade e coa seguridade garantida en todo o percorrido.  

Temos que salientar, sen dúbida, a implicación total de todas as familias que compoñen a nosa gran Comunidade Educativa. Talleres de confección de disfraces que comenzaban as 15.15h os luns e remataban máis alá das 20.00... Colaboración total na aquisición de materiais e complementos para que o noso alumnado lucira espectacularmente... E, finalmente, a estupenda resposta ao chamamento do centro para acompañar aos distintos grupos do centro aportando medios musicais e facendo do Desfile deste ano un dos mellores que se poden recordar. Non temos palabras para agradecer todas as aportacións que sempre facedes cando así volo pedimos.

Por suposto temos que recoñecer o  marabilloso traballo levado a cabo polo profesorado do noso cole. Planificar, decidir disfrace, facer patróns, coser, adquirir complementos, xestionar compras... e unha longuísima lista de traballos a realizar sen horarios e cunha dedicación e entrega case exclusiva merecen, pensamos, un grandísimo aplauso para tod@s el@s... Moitas grazas, compañeir@s!!

E por último, pero para nada menos importante, o noso alumnado. Colaborativo, @s máis grandes e "sufridor@s", o máis miúdo, son, sen dúbida, @s grandes protagonistas deste día. Sen el@s, nada disto tería sentido! 

Esperando xa o Entroido 2025, non queda máis que gozar con elas e eles, cheos de cor, enchendo de que maneira as rúas da nosa vila!!

Eu son unha/un Pisacharcas !!!

"Creo que algo moi máxico pode suceder cando se le un bo libro." (JK Rowling)

Queres ser unha/un PisaCharcas? Queres vir a contarlle/lerlle á clase da túa filla/fillo, neta/neta, sobriña/sobriño o seu conto/libro favorito? O único que tes que facer é enviarnos un correo electrónico a acharcadoslibros@gmail.com onde poñas no asunto "Eu quero ser unha/un Pisacharcas" e nos indiques os seguintes datos:

Nome do nai/pai, avó/avoa, tía/tío, .... :

Nome da nena/neno:

Curso da nena/neno:

Mestra/mestre da nena/neno:

Nome do conto/libro que vas vir a contar/ler:

Día a que che vai mellor vir ao cole (sempre de luns a venres á hora de ler: 12.10):

Contestaremos ao teu correo ou porémonos en contacto contigo tan pronto coordinemos coa clase da túa filla/o.

Anímate a participar!!!