Desde pequena sempre quixen vivir en Piñeira

"Calquera que saiba un pouco de historia sabe que o progreso sería imposible sen a figura feminina". Karl Marx, filósofo prusiano 

"O concerto de Aninovo" nunca foi dirixido por unha muller

 "Feminista é calquera que recoñeza a igualdade e a plena humanidade en mulleres e homes". Gloria Steinem, xornalista estadounidense.

              

Que bonito é o mundo da radio!

"A pregunta non é quen me vai a deixar; é quen vai determe." Ayn Rand, filósofa e escritora rusa.

Hoxe foi unha desas mañas de "primeiras veces".... Era a primeira vez que gravabamos un podcast co alumnado de sexto e tamén foi a primeira vez que tivemos a oportunidade de escoitar a estas dúas "bravas mulleres" defendo causas tan importantes na formación de todo o noso alumnado como o feminismo, a defensa da lingua, a importancia do rural, ... entre outras.

Hoxe soubemos que o saxofón non foi a primeira escolla como instrumento para Esmeralda, ou que os músicos que van á Arca da Noe ou porque ben lle gustan a ela ou porque son eles mesmos os que queren ir tocar alí... E outras moitas curiosidades que descubrimos sobre elas e que saberedes moi pronto!! 

Noe Vázquez e Esmeralda Marra son dúas das nosas "Mulleres Ilustradas" e nesta entrada do noso blog só queremos facer un pequeno adianto do que serán as emisións completas das gravacións que fixemos hoxe.

Queremos dar as grazas especialmente a Óscar polo agarimo co que fai este traballo que require tanta paciencia con todo nós, á ANPA do noso centro e ao CDR O Viso por invitarnos a embarcarnos tod@s xunt@s neste proxecto tan ilusionante para todo o centro.

En breve, teredes máis novas desta RadioRosalía que acaba de nacer!!!!

Pontes de Letras, Fontes de Saber

"O camiño máis breve cara á ciencia é a atención e dilixencia en escoitar."Juan Luis Vives (1492-1540), humanista e filósofo español.

Asistimos á I Jornada Formativa de Intercambio Docente entre o noso centro e o Agrupamento de Escolas António Feijoó de Ponte de Lima.

Estas xornadas de traballo están englobadas dentro do Proxecto do "Abrazo/Abraço ao Rio Limia/Lima", que dende fai máis de dez anos teñen medrado dun xeito expoñencial e que con este tipo de encontros salta a outro nivel de cooperación.

Os Equipos das Bibliotecas Escolares do Agrupamento de Escolas António Feijó dalgunhas das súas escolas (EB1 de Ponte de Lima, EB do Trovela, EB da Feitosa e a Sede Principal do Agrupamento) compartiron co noso profesorado experiencias de formación a todos os niveis (alumnado, profesorado, familias e persoal non docente) abrindo novas posibilidades de levar a cabo esas experiencias no noso cole.

O agarimo, a familiaridade e o trato exquisito foron os sinais constantes  por parte dos nosos colegas portugueses ao longo de toda a xornada. Moitas grazas a todas e todos @s profesor@s, responsables, nais/pais, ... (non nomeamos a ningún porque non queremos esquecernos de ninguén!!!) de todos os centros que nos acolleron e trataron tan ben e por compartir con nós esas experiencias tan interesantes que, sen dúbida, tentaremos poñer moitas delas en práctica!

Esperamos estar á altura na vosa próxima visita á nosa escola en xaneiro! Ate já!!

Fagamos un círculo máis grande para incluír a tod@s

" A diversidade é que te conviden á festa. A inclusión consiste en que te saquen a bailar." Verna Myers, experta internacionalmente recoñecida en diversidade, equidade, e inclusión.

Conmemoramos o día 3 de decembro o Día Internacional das Persoas con Discapacidade e este ano a ONU fixa como lema "Nada sobre nós sen nós", co que prentende fomentar o liderado das persoas con discapacidade para un futuro máis inclusivo e sostible.

Neste lema condénsanse os principios de participación, representación e inclusión. Este lema pon de relieve, ademais, a importancia de que as persoas con discapacidade sexan protagonistas na toma de decisións sobre as súas vidas.

No noso centro e dentro do ámbito escolar escollimos "Alguén fixo un círculo para deixarme fóra, fagamos un máis grande para incluir a tod@s"

Ao longo destas xornadas todos os cursos fixeron actividades sobre este  propósito que é un dos sinais do noso cole: o da inclusión.

Para visibilizar todo este traballo fixemos un gran mural onde están todas as mans do noso alumnado nese gran circulo onde collemos todas e todos!

Galletas na nosa cociña

"Coida o teu corpo. É o único lugar que tes para vivir." Jim Rohn, empresario estadounidense

O pasado venres volvemos contar coa axuda das familias para elaborar unha deliciosa receita de galletas de manteiga, ideais para preparar este Nadal!

Desfrutamos mezclando os ingredientes, amasando e dando forma ás nosas galletas.

Non quedou nin a mostra!

Moitas grazas ás mamás participantes.

Seguiremos cociñando despois das vacacións.

25N - O machismo é violencia con todas as letras

 "Eu son doutro conto onde as princesas rescátanse soas" 

O machismo é violencia con todas as letras é o lema escollido pola Consellería de Política Social e Igualdade para conmemorar este ano o Día Internacional para a Eliminación da Violencia contra as Mulleres.

Nós, na nosa escola, quixemos darlle unha volta e buscamos un novo abecedario con caseque todas as letras onde buscabamos termos que nos fixeran reflexionar sobre todo o antitético a todo tipo de violencia relacionado c@s outr@s.

Beixo, Familia, Gladiadora, Cariño, Xuntas, ... son algún dos termos que o noso alumnado escolleu e co que traballaron todas as clases ao longo destas xornadas.

Tamén levamos a cabo outras moitas actividades onde o papel de empoderamento das nenas tiñan un rol importantísimo nas relacións entre igual co fin de dar ferramentas a elas (e por suposto a eles tamén) para saber relacionarse mantendo relacións de igual a igual e rexeitando todo tipo de imposicións.

Non temos dúbida que a formación e a información a estas idades son a base para formar ás nosas e aos nosos futuras e futuros cidadáns!!!

O mundo está roto pero pódese camiñar

"Cando todo pareza ir na túa contra, lembra que o avión despega contra o vento", Henry Ford, empresario estadounidense. 

O noso alumnado de quinto e sexto de Educación Primaria asistiu hoxe á representación por parte da compañía Contra Produccións da obra "O mundo está roto pero pódese camiñar", que é unha peza para público infantil e familiar que, nun ton poético e nunha estética fresca e luminosa, conta o relato dunha reconciliación, coa vida e co seu pai, dunha nena de dez anos ferida por unha perda traumática.

Nesta obra unha nena perde prematuramente a súa nai e, desde entón, está enfadada co mundo. O pai non sabe como romper o muro de incomunicación no que se encerrou a filla e argalla un curioso sistema: escribirlle mensaxes en avións de papel que lle lanza cada día desde o balcón e onde lle encomenda pequenas tarefas diarias como, por exemplo, ir devolver un libro á biblioteca.

Unha bibliotecaria amena e espelida axuda á nena a descubrir o vínculo entre os libros e a vida, logrando establecer coa cativa unha relación divertida, construtiva e inspiradora. Moitos anos despois, a nena, agora escritora, voltará á biblioteca para contarnos aquela experiencia iniciática e sanadora. (https://bit.ly/3O812bH)

Despois todo o grupo deu un "paseo didáctico" por Ourense, descubrindo lugares historias que pensamos foron do seu agrado. Unha xornada completa de aprendizaxes nun contexto distinto ao de outros días!

O pasadizo do terror!

"Ás veces perdes unha batalla. Pero as travesuras sempre gañan a guerra." John Green,  escritor estadounidense.

As mestras de Educación Infantil prepararon unha chea de actividades para conmemorar o Samaín co seu alumnado. Disfraces, merendas especiais, ... e ata un pasadizo do terror cheo de probas e actividades por superar. Todo un acerto!! O noso alumnado gozou con todas elas e este pequeno vídeo e boa mostra diso!!!

Samaín en cinco anos

"Ser neno é vivir entre soños e xogos, sen saber onde rematan uns e empezan outros." Autor descoñecido.

Esta pasada semana quixemos que nenas e nenos fosen os protagonistas dunhas actividades moi especiais. Comezamos o luns, cos ollos brillantes de emoción e as mans ben arremangadas, vaciando cabazas, entre risas e algún que outro berro de sorpresa ao tocar a viscosa masa interior.

O martes foi hora de meter as mans na masa, literalmente, xa que xuntos creamos unhas masas de cores ao gusto de cada quen.

E chegou o gran día de Samaín. Ataviados coas nosas galas máis aterradoras participamos nun circuíto terrorífico con moita diversión e momentos para recordar.

Merendas terroríficas para @s máis pequen@s do cole!

"Non te deixes invadir... na Galicia temos Samaín"

@s máis pequen@s do cole poideron relamberse con estas merendas tan monstrosas que as súas mamis e os seus papis fixeron chegar ao cole. Pantasmas, morcegos, ... e demías protagonistas deste noso Samáin foron as vítimas das nenas e nenos de tres anos que non deixaron nin rastro destas criaturas terroríficas!

Remataron cun esconxuro onde cahamron as todas as meigas boas para cumprir co ritual tan propio destes días.

 Grazas familias por facelo posible !!!

Pequenos grandes chefs

 " Unha receita non ten alma, é o cociñeiro quen ten que darlle alma á receita" Thomas Keller, chef estadunidense

Coa chegada da festividade do Samaín,o alumnado de 6° de Educación Infantil non quixo perder a oportunidade para cociñar un rico biscoito de cabaza. Entre todos, e con moita ilusión e organización, picamos a cabaza, batemos ovos, medimos e pesamos o resto de ingredientes e mesturamos todos ata conseguir unha masa perfecta.

Aínda que o resultado non foi proporcional á ilusión coa que cociñamos, quedámonos coa experiencia e a vivencia de seguir sumando grandes momentos para crear recordos inesquecibles.

Día das Bibliotecas 2024: Por un futuro sostible

“En caso de dúbida, vai á biblioteca.” J.K. Rowling , escritora británica

Dende 1997 celébrase o Día das Bibliotecas o 24 de outubro,  unha conmemoración impulsada pola Asociación de Amigos del Libro Infantil y Juvenil á que se foron sumando, xa dende hai algún tempo, o propio Ministerio de Cultura e todas as administracións autonómicas.

A Dirección Xeral do Libro, o Cómic e a  Lectura, a través da Subdirección Xeral  de Coordinación Bibliotecaria, impulsa a celebración do Día das Bibliotecas, este 24 de outubro de 2023.  

O lema deste ano, "Por un futuro sostible", pretende destacar o papel fundamental que desempeñan todas as tipoloxías de bibliotecas (públicas, escolares, universitarias, especializadas e nacionais/rexionais) na consecución dos Obxectivos de Desenvolvemento Sostible da Axenda 2030.

A través das súas coleccións, servizos e actividades con usuarios, as bibliotecas contribúen a construír unha sociedade cada vez mellor informada, máis igualitaria, solidaria e xusta, plenamente consciente da necesidade de levar un modo de vida sostible como compromiso coas xeracións futuras. 

As bibliotecas escolares galegas amosáronse, e continúan facéndoo, como unha ferramenta ao servizo da comunidade educativa ofrecendo recursos, información e apoio,  lugares que contribúen á formación dunha cidadanía crítica, activa e comprometida. O seu traballo de deseño e planificación de actividades e servizos desenvólvese cunha perspectiva de Axenda 20230 poñendo o foco en que ninguén das nosas comunidades educativas debe quedar atrás.

A biblioteca escolar, esa biblioteca pola que pasan todas as nenas e todos os nenos do país, a primeira biblioteca que lles aprende, tamén, a usar outras, que os pon en contacto con eses outros espazos do coñecemento e do lecer, eses lugares nos que pasan moitas cousas, que son as bibliotecas públicas, eses lugares que están sempre ao noso carón: as BIBLIOTECAS. 

 #DíaDasBibliotecas #Por un futuro sostible  

https://www.edu.xunta.gal/biblioteca/blog/?q=node/1800

Xa chegou o Samaín!!

 «Más libros, máis libres». Enrique Tenro Galván, ensaísta, político, sociólogo e xurista español.

Xa temos ao voso dispor a nosa selección de títulos sobre o Samaín!! Non dubidedes en pasarvos pola Biloteca do cole e levarvos un destes libros para unha boa tarde de lectura. 

Correde... que voan!!!

Preparamos unha torta riquísima!!!

 «A gastronomía é a arte de usar os alimentos para crear felicidade».Theodore Zeldin, profesor universtario británico.

O alumnado de quinto de Ed. Infantil tiñamos moitas ganas de visitar o taller de cociña do noso cole e que mellor oportunidade que elaborar unha riquísima torta de mandarina coa axuda das mamás e  que viñeron a botarnos unha man.

O primeiro que fixemos foi elaborar a receita que ibamos facer, fixándonos nos ingredientes que utilizariamos e os utensilios que cociña que ibamos a precisar.

Despois xa só quedaba poñer mans á obra e nun ratiño e coa axuda de todo o persoal de cociña do cole, xa tiñamos preparada o almorzo de media mañá dese día.

E quedounos.... Riquísimo !!!

Normas do préstamo para usuarios da biblioteca

“A biblioteca destinada á educación universal, é máis poderosa que os nosos exércitos.” José de San Martín, militar e político arxentino.

A vindeira semana poremos en marcha o préstamo da biblioteca do centro.

 O alumnado  que queira realizar un préstamo deberao facer nos recreos establecidos para a súa clase. 

 Poderán ter o libro durante 15 días; despois deberán devolvelo ou renovalo. 

No caso de non facelo non poderán levar outro libro ata pasados 15 días. En  caso de perda deberá ser reposto ou abonado.

Grazas pola vosa colaboración.

Almorzos sans: Preparamos unha ricas galletas!!

 "Coida o teu corpo. É o único lugar que tes para vivir." Jim Rohn, orador dos EUA

Fomos @s encargad@s de estrear o novo espazo do centro dedicado aos obradoiros de cociña entre outros moitos quefaceres...

Estamos aprendendo a importancia de alimentarse ben e como hai certos "almorzos" que poden ser ben ricos e ben sans, como é o caso destas galletas que preparamos con plátanos e avea. Tivemos que completar todo o proceso, dende esmagar a froita, engadirlle o cereal, darlles forma e colocalas na placa do forno, para que despois Pablo, o cociñeiro do cole nos botara un man (máis ben as dúas) para fornealas e poder probar despois na clase  estas riquísimas galletas que preparamos.

Estamos segur@s que esta foi a primeira das moitas veces que seguiremos elaborando e descubrindo alimentos que nos gustan moito e que son bós para a nosa saúde!!

Mais um ano!

Participamos un ano máis no XIII Abraço ao Rio Lima, convidados pola Câmara Municipal de Ponte de Lima e cun programa de actividades para o xoves 10 e o venres 11 onde se inclúen distintos momentos de convivencia co alumnado do centros Educativos de Ponte de Lima e de Arcoçelo. Cremos que este tipo de actividades é moi enriquecedora para o noso alumnado porque lles brinda a oportunidade de coñecer outras realidades do mundo educativo e facer novos vínculos con nenos e nenas da súa idade dun país diferente.

¡Ourense sobre rODaS!

"Cada un de nós podemos facer cambios na forma en que vivimos e ser parte da solución ao cambio climático.  Al Gore, exvicepresidente dos EUA"

A Deputación inicia a campaña Ourense sobre rODaS!, que achegará os Obxectivos de Desenvolvemento Sostible a concellos e centros educativos da provincia, no marco do proxecto OU DS Axenda 2030 – financiado polo Ministerio de Dereitos Sociais e Axenda 2030.Esta campaña permitirá achegar os ODS a 12 concellos e 18 centros escolares, difundindo e sensibilizando á poboación ourensá co desenvolvemento sostible.

Nos centros escolares dos 18 concellos participantes haberá actividades dirixidas ao alumnado de infantil e primaria e, entre os maiores, promoverase a importancia de coidar o medio ambiente e a natureza, temas asociados ás metas 13, 14 e 15 dos Obxectivos de Desenvolvemento Sostible 2030, mentres que os máis pequenos poderán gozar de fantásticos conta contos. (https://21noticias.com/2024/09/16/comienza-la-campana-ourense-sobre-rodas/)

O alumnado de 5º de Educación Infantil do noso centro foi o destinatario desta campaña e puideron realizar unha sesión de contacontos co título de Capitán Verdemán, un novo superheroe para un novo mundo que nunha pequena cidade que está a afogarse nas cheas de lixo, pola preguiza e o malgasto dos seus habitantes aparece  para rescatar á cidade e demostrar que a reciclaxe é divertido.

Posteriormente todas as nenas e nenos de catro anos realizaron un obradoiro con distintas actividades relacionadas coa reciclaxe e  todo o que acababan de aprender nese conto.

BENQUERER: A nova aposta de Xinzo pola igualdade e o respecto

"Un home só ten dereito a mirar a outro cara abaixo, cando ha de axudarlle a levantarse." Gabriel García Márquez, escritor colombiano.

O Concello de Xinzo de Limia, a través da Concellería de Servizos Sociais e Igualdade e o Centro de Información ás Mulleres, puxo en marcha BENQUERER: un programa de promoción da igualdade e prevención da violencia de xénero.

Esta iniciativa do Concello de Xinzo de Limia ten como obxectivo promover a igualdade de xénero e a prevención da violencia de xénero a través da educación nas prácticas e valores de bo trato como modelo alternativo ao maltrato para a construción de vínculos igualitarios. Dende BENQUERER fomentarase a resolución positiva de conflitos, o reparto de tarefas e responsabilidades, o diálogo, a non discriminación e o respecto á diversidade.

O programa inclúe obradoiros dirixidos o público en xeral que complementarán no mes de setembro con actividade nos colexios e institutos de Xinzo coordinadas dende o CIM. Nesta ocasión, foi o alumnado de sexto de Educación Primaria do noso centro o que participou nestes obradoiros.

Este proxecto do Concello de Xinzo de Limia, a través da Concellería de Servizos Sociais e Igualdade e o Centro de Información ás Mulleres está financiado pola Consellería de Política Social e Igualdade da Xunta de Galicia.

Ademáis, O programa BENQUERER inclúe tamén a Liña Malva, un servizo de atención continuada a través dunha liña telefónica para a información, asesoramento e primeira atención en situacións de maltrato, relacións, saúde e sexualidade. Un servizo posto a disposición en horario amplo (de 9 a 21h) no 669945220, atendido por profesionais especializadas que brindan escoita, cercanía, confianza, libres de xuízos e facilitando a comunicación e a atención.

Primeira reunión do Consello da Infancia

"En cada neno deberíase poñer un cartel que dixese: Tratar con coidado, contén soños." Mirko Badiale, filósofo italiano.

Este  curso desde o Equipo de Convivencia propuxemos a creación do Consello da Infancia, un órgano que pretende ser a voz do alumnado para mellorar a convivencia no centro. 

Despois de levar a cabo dentro de cada aula de Educación Primaria todo o proceso de elección de representantes do alumnado, o noso Consello da Infancia reuniuse por primeira vez no Espazo Creativo do centro.

unha vez feitas as presentacións, e coa presenza do director e da orientadora do centro, este Consello pasou a escoller a súa/o seu presidenta/e e secretaria/o. 

Comprobando que a maioría dos seus membros querían participar activamente dentro deste órgano, decidiuse por unanimidade que ambos cargos serían rotativos ao longo de todo o curso escolar.

Rematamos esta primeira sesión co encargo da tarefa de recoller entre todo o alumnado do centro aquelas iniciativas que poidan mellorar a convivencia no centro.

Invisible

"Hai cousas peores que ser invisible", dixo o monstro, e tiña razón. "Un monstro vén verme" (2011), Patrick Ness

Quen non desexou algunha vez ser invisible? Quen non desexou algunha vez deixar de selo? O novo álbum de Eloy Moreno combina o mellor de dous mundos: o formato  da colección Contos para Contar entre Dous e a historia que emocionou por centos de miles de lectores. E ademais:

• Preguntas para que os nenos participen.
• Personaxes cos que os nenos e as nenas identifícanse.
• Ilustracións que lles axudan a desenvolver as súas habilidades de observación.
• Un texto coidado que impulsa o desenvolvemento das emocións.

En definitiva, un libro co que nenos e pais poderán non só  divertirse, senón que tambien aprenderán, participarán e, sobre todo, vivirán xuntos un momento moi especial. Un libro perfecto para gozar en familia.

De novo contamos con Diana como #PisaCharcas para traer á nosa Biblioteca escolar este fermoso libro que nos vai descubrir un montón de cousas sobre esas persoas que nunca vemos.... ou que non se queren deixar ver.... Anímaste a respostar a moitas cuestións super interesantes?

Fin dunha etapa... comezos de novas ilusións!!!

"Non é grande o que sempre triunfa, senón o que xamais desalenta" . 

José Luis Martín Descalzo, sacerdote, periodista e escritor español

Dedicado a vós, mozas e mozos da promoción 2023 - 2024... Sempre Rosalian@s !!!

La magia de mi nombre

"Canto máis les, máis cousas saberás. Cantas máis cousas aprendas, a máis lugares viaxarás." Dr. Seuss, escritor e debuxante estadounidense

Magalí, nova #Pisacharcas do noso cole, e Ares levaron ata a nosa BE unha fermosa historia de fadas e nenas que queren saber todo ao redor do seu nome. Ao longo deste fermoso conto, Ares, a protagonista desta historia, descubrirá o poder das letras que compoñen o seu nome e todas as aventuras que vai poder vivir grazas a chamarse dese xeito.

Motos, pizzas, monstros, estrelas, ... e outros moitos elementos e personaxes irán aparecendo nos seus soños para chegar á mañá seguinte sabendo que especial e máxica somos cada un/unha de nós!!

Coñecemos melllor o noso río Limia

"Os ríos son místicos. Son unha parte máxica, vivente e dinámica do planeta Terra." Laura Gilpin, fotógrafa estadounidense.

Dentro das moitas actuacións levadas a cabo polo noso alumnado ao redor dun elemento tan emblemático como é para nós o Rio Limia, desta vez, da man da Asociación en Defensa Ecolóxica de Galicia (ADEGA), @s nen@s de cuarto de EP achegáronse ás beiras do río para coñecer de primeira man distintas especies de flora e fauna que alí habitan. Distinguiron cales delas son autóctonas, e por conseguinte, beneficiosas para o entorno natural e cales podemos consideran invasoras, ás que debemos prestar unha atención especial polos riscos e perigos que elas comportan.

Este obradoiro vése complementado cunha interesante exposición no noso centro composta por  catorce paneis onde podemos identificar estas e outras especies que podemos atopar ao longo de todo o territorio galego.

Aprendizaxes no medio que se producen son, sen dúbida, elementos que forman a un alumnado competente nas áreas do currículo que estudian dentro e fóra do centro escolar.

Diferentes diferenzas

 "Nunca pensamos no excepcional que é o común para diferentes persoas". Eloy Moreno, escritor español

A diferenza como elemento enriquecedor, divertido e dinamizador. Os protagonistas deste libro son diversos e diferentes. Amósannos que empregan as súas características particulares para gozar dunha vida plena e chea de amigos e aventuras. Un elefante de tres patas, un moucho de catro ollos, unha tartaruga sen cuncha ou un libro sen cuberta… cantas cousas diferentes poden facer!

Incluímos dentro da nosa colección Carantoña, para prelectores e primeiros lectores, en letra maiúscula, este delicioso álbum infantil que é un canto á diversidade e mesmo á disfunción. En definitiva, o que nos define como individuos non é o número de pernas, ollos ou vitorias que acumulemos, senón como afrontamos o mundo e a nosa relación cos demais.                https://www.editorialbululu.com/producto/diferentes-diferenzas/

Telma e Inma, a nosa #Pisacharcas, escolleron esta fermosísima historia, gañadora da XIX edición do premio literario Frei Martín Sarmiento na categoría infantil, sobre a importancia de valorar o ser diferentes, un dos valores chave do noso cole. O respecto aos demais, sexan como sexan, e a importancia de poñer en valor cada un dos noso potenciais, distintos aos dos demais, fan de cada un/unha de nós, alguén verdadeiramente especial e único no mundo. Non o esquezades NUNCA!!

Tod@s @s compañeir@s de Telma levaron un agasallo moi especial e que sempre lles recorda esta fantástica mañá que pasaron xunt@s!!

Peter Pan

 "Todo o que necesitas para lograr os teus soños é confianza, fe e un pouco de po de fadas." Peter Pan

Jessenia, #Pisacharcas do noso cole, acompañada de Ana e Lucía, trasladou a toda a clase de 5 anos B ao País de Nunca Xamais dentro do Espazo Creativo do noso cole!

Neste conto clásico de James Matthew Barrie, resalta valores como a amizade, o arrepentimento, o saber perdoar, o traballo en equipo, a solidariedade e tamén pon un acento especial no neno, no importante que é xogar, pero tamén  o máxico que pode ser crecer.

Non temos ningunha dúbida que tod@s @s nen@s deste curso, ademáis do fermoso agasallo que levaron, pasaron un bo rato cheo de maxia e emocións!!

Sementando responsablemente

“A natureza non é un lugar para visitar. É o fogar.” Gary Sherman Snyder, poeta e activista estadounidense.

Segunda actuación de Edualecrín no noso cole. O alumnado de cuarto de EP foi o destinatario deste obradoiro no que tiveron como obxectivo descubrir moitos dos elementos que nos rodean e que nos das pistas para saber que animais e plantas temos ao noso redor.

Como segunda actuación foron el@s @s responsables de poñer en marcha un “horto ecolóxico” no noso centro, escollendo os produtos máis axeitados á contorna na que van estar e fixando as “defensas” fronte a posibles pragas que puideran aparecer. Para este fin, sementaron tamén plantas aromáticas e colocaron insectarios na zona de plantación como barreiras ante eses posibles atrancos.

Foron unha xornadas cheas de aprendizaxes significativos con a propia experimentación como ferramenta de achegamento ao coñecemento, o que as converten en  moi significativas e difíciles de esquecer.

Somos consumidor@s responsables

 “Vivimos na terra coma se tivésemos outra á que ir.” Terry Swearingen, activista ambiental estadounidense.

Educalecrín é unha cooperativa de educación social e medioambiental que nace co obxectivo de mellorar a calidade de vida de tódolos seres. Realizan actividades educativas e de ocio para persoas de tódalas idades.

Desta volta, traballaron no noso centro co alumnado de terceiro de EP sobre o consumo de produtos de proximidade  e de consumo responsable.

Presentáronlle distintos productos de horta e de proximidade cos que el@s tiñan que elaborar a súa propia "dieta planetaria", introducindo nela distintos alimentos seguindo as pautas que lles deron Natalia e Verónica.

Esta liña de traballo está dentro do noso Proxecto de Voz Natura e relacionada, como non, cos Obxectivos de Desenvolvemento Sostible (ODS) fixados pola ONU e que están dentro das nosas prioridades para formar alumnas e alumnos competentes e responsables co consumo e o coidado do medioambente.

La Cenicienta

"A literatura non é outra cousa que un soño dirixido." Jorge Luis Borges.

Non abandonamos os contos clásicos da literatura infantil...  A historia de Cincenta ensínanos que, mesmo nas situacións máis difíciles, debemos manter a esperanza e ser amables cos demais. Tamén nos amosa que o que din os demais sobre nós non determina o noso valor e que, coa axuda dos nosos amigos e a nosa determinación, podemos superar calquera obstáculo e alcanzar os nosos soños. 

Este conto de Perrault que tan ben nos relatou a nosa #PisaCharcas Soralla acompañada de Dylan e Daniel na nosa Bibilioteca Escolar mantivo ata o final a curiosidade e a atención de tod@s @s compañeir@s da súa clase!!! Estamos seguros de que a volveremos ver por aqui!

Avoíña, avoiña... Que dentes máis grandes tes!!

"A lectura é un ticket de desconto a todas partes." Maria Schmich, xornalista estadounidense

Quen non coñece esta frase dun dos contos máis famosos da literatura infantil? Patricia, a nosa #Pisacharcas, xunto con Aroa foron as encargadas de contar esta marabillosa historia a tod@s @s seus compañeir@s no noso Patio das Bolboretas.

Tivemos á mesmísima Carapuchiña Vermella relatando todo o que lle pasou de camiño á casa da súa avoa para levarlle algo de comer... E como todo o alumnado estivo moi atento, levaron un detalliño da súa parte ás súas casas!

O Camiño non se anda... vívese!

"Santiago non é o final do Camiño, se non o principio". Paulo Coelho

Vexo vexo, Xacobeo é un programa educativo multidisciplinar para achegar ao alumnado o significado e os valores do Camiño de Santiago e do Xacobeo e traballar, dende as primeiras etapas, estes conceptos que forman parte da súa contorna social e cultural.

Un ano máis o noso alumnado de sexto de Educación Infantil percorreu a etapa do Camiño de Santiago que vai dende Porto Alto ata ao Parque da Pantalla en Xinzo de Limia para, posteriormente, visitar o Albergue de Peregrinos da nosa Vila.

Gozaron dun día espectacular camiñando á beira do río Limia e no camiño atoparon moitas, moitas sorpresas!!!

Exploramos novas vivencias!

"Unha viaxe mídese en amigos, non en millas." Tim Cahill, futbolista australiano.

Os alumnos e alumnas de 5 de Ed. infantil viviron unha xornada inesquecible na cidade de Ourense,onde a historia e a cultura abrollan en cada recuncho. A súa aventura comezou nas Burgas, fonte termal que é a testemuña da rica herdanza romana da cidade. Continuaron visitando a praza de abastos e as múltiples estatuas da rúa do Paseo, reflexo dos oficios da nosa Galicia. A ponte Romana serviu de ponte no tempo levándoos á época dos antigos constructores. A visita das Termas de Outariz foi o colofón dun día cheo de descubrimentos. Xa nas termas, unha comida todos xuntos fortaleceu lazos e preparou aos nosos cativos e cativas para as actividades lúdicas que tiñan preparadas as mestras.

Con sorrisos e novos coñecementos, regresaron a Xinzo, levando consigo recordos que perdurarán moito tempo!

Aprender a saber coidarnos

"Coide o seu corpo. É o único sitio que vostede ten para vivir." Jim Rohn, escritor estadounidense.

Dentro das distintas accións de colaboración con outras entidades, desta volta foi a quenda de Antía e Lorena, do Centro de Saúde de Xinzo de Limia que viñeron a presentar ao noso alumnado de cuarto de Educación Primaria unha serie de coidados básicos de saude bucodental de de bos hábitos de alimentación.

O alumnado aprendeu a importancia de saber que comemos para poder distinguir aqueles alimentos que son máis recomendables para manter unha dieta sana e equilibrada. Así mesmo, poideron escoitar da man destas dúas profesionais cal e cando é o mellor momento para cepillarse os dentes e que distintos elementos podemos atopar na boca e como coidalos moito mellor.

Foi, sen dúbida unha mañá chea de aprendizaxes interesantes e significativos, encadrados perfectamente dentro do currículo escolar, pero impartidos por profesionais que coñecen perfectamente o impacto destas charlas entre o alumnado do noso centro

Queda sitio na vasoira?

"Un libro é un soño que vostede ten nas súas mans." Neil Gaiman,escritor inglés.

A bruxa vai toda contenta na súa vasoira co seu gato, ata que lle cae o lazo da súa trenza entre as silvas. Aí comeza unha aventura que acabará liando a unha paxara, unha ra, un can e un dragón nunha aventura trepidante e fascinante por terra, por mar e sobre todo, por aire. Este libro é unha mestura de aventuras, risas e nervios nesta historia inesquecible de amizade, monstros e sobre todo, moita maxia! https://www.casadellibro.com/libro-queda-sitio-na-vasoira/9788494634123/12625317

Bruxas, vasoiras e distintos animais... que pode fallar para que esta historia que a nosa nova #PisaCharcas Isabel e Lois trouxeron á nosa Biblioteca Escolar non enganche a tod@s @s súas/seus compañeir@s?? 

Moitas grazas por visitarnos e dramatizar este fermoso conto cheo de misteiros....

#SomosArte

 « O arte é o que deixas saír». Andy Warhol

Nesta actividade de cadros humanos de famosos como Frida Kahlo e Vincent van Gogh recreáronse algunhas das súas obras máis icónicas sendo o alumnado un lenzo. 

Os participantes nesta actividade tiñan que pousar de forma estática e seguindo as poses e xestos característicos dos retratos orixinais. Ademais, poderíanse incorporar elementos escenográficos e accesorios que axuden a recrear o ambiente e a atmosfera das obras.

Esta actividade homenaxea a estes famosos artistas e deunos  a coñecer a súa obra dunha maneira orixinal e creativa,  experimentando a sensación de formar parte dunha obra de arte e explorar a súa creatividade a través da interpretación dos personaxes retratados.

E tamén para saber que nós mesmas somos unha obra única...!!!

A toupiña que queria saber quen lle fixera aquilo na cabeza

"Para viaxar lonxe, non hai mellor nave que un libro."  Emily Dickinson, poeta estadounidense.

Pode pasarlle a calquera, pero un día saíu do tobo e alguén lle fixo aquilo na cabeza. Quen sería? A pomba, o cabalo, a lebre? Este conto de Werner Holzworth e Wolf Erlbruch é xa un éxito da literatura infantil. As risas están aseguradas, xa que a temática escatolóxica sempre fai graza aos máis peques.

Diana e Icía traen á nosa Biblioteca Escolar esta divertida historia da toupiña que tivo un "accidente" e ao longo do relato será quen de aveirguar quen é o/a culpable... Ou non?? 

Estamos segur@s que esta non será a última visita que a nova #PisaCharcas fará ao  noso cole... Quedamos pendentes da súa seguinte visita!

A forza dos valentes está no corazón

"Es ti, es así. Que os demais non o aceptan? Pois alá eles! Como ti non hai ninguén." Vanesa, Romero, modelo, presentadora e actriz.

Desde o 2 de maio de 2013, celébrase nesta data o Día Mundial contra o Acoso Escolar. Foi promovido pola entidade ‘Bullying Sen Fronteiras', cun comunicado inicial apoiado por máis de 3.000 organizacións non gobernamentais de todo o mundo.

Con esta intención nace esta conmemoración anual, para dar visibilidade a un problema, como é o acoso escolar. Desde entón, fixaron dous modelos de persoas, como son Martin Luther King e Nelson Mandela, abandeirados de liberdades e causas xustas xa que, como dicía Mandela, "a educación é a arma máis poderosa que podes utilizar para cambiar o mundo".  http://educalab.es/-/2-de-mayo-dia-mundial-contra-el-acoso-escolar-

O noso cole sempre ten a loita contra este tipo de actitudes como sinal de identidade permanente e amosamos tolerencia cero ante o acoso escolar. Sempre está presente en todas as accións que a Consellería de Educación leva a cabo para previr e atallar calquera forma de violencia e discriminación nos centros educativos.

“Os abusóns non teñen cabida no sistema educativo galego”, dixo Alfonso Rueda na presentación do "Plan integral contra o acoso ecolar e o ciberacoso con puntos laranxas físicos e virtuais para denunciar de forma anónima e segura". No Rosalía, por suposto que non! 

Visitamos o Centro do Lobo Ibérico

"Un home pode facerse amigo dun lobo, pero ningún home será capaz de domesticalo en realidade." George R. R. Martin, escritor estadounidense.

O alumnado de terceiro de Primaria visitou o Centro do Lobo Ibérico de Castela León en Robledo de Sanabria. Alí poderon comprobar de primeira man que fermoso é este animal e aprender un montón de datos e curiosidades sobre este cánido que pobra os nosos montes.

Remataron o día cunha visita a un dos "Pueblos más bonitos de España", como é Puebla de Sanabria, coas súas empinadas rúas e o seu Casco Histórico Medieval.

Unha xornada chea de aprendizaxes significativos e que recordarám estas nenas e nenos por moito tempo!

Feliz Día do Libro!

 “Aprender a ler é acender un lume, cada sílaba que se deletrea é unha faísca.” Victor Hugo, escritor francés.

Chega unha das actividades máis esperadas do curso!

O amadriñamento/apadriñamento lector enche o noso cole de libros compartidos polo alumnado dos distintos cursos. Unha gran oportunidade para convivir e compartir unha experiencia única que ano a ano fai deste Día do Libro unha data especialmente sinalada no noso calendario. Cando lemos, visitamos outros mundos, outras realidades … e que mellor que facelo en moi boa compañía!!!

Coñecer para protexer

 "En cada nena e neno deberíase poñer un cartel que dixese: Tratar con coidado, contén soños." Mirko Badiale, escritor e filósofo italiano.

Dentro das actuacións que levamos a cabo conxuntamente co CDR O Viso e coa Plataforma de Organizacións de Infancia de Galicia (POIG), enmárcase esta charla á que asistiu o noso alumnado de quinto de Educación Primaria.

Na Lei Orgánica de Protección Integral á Infancia e Adolescencia contra a Violencia (LOPIVI) xa menciona que cada centro educativo ten que ter unha/un coordenadora/corrdenador de Protección para escoitar e defender a todo o alumnado e facer do centro educativo un centro seguro. Este rol en todos os centros educativos de Galicia está asumido polo Coordenador/a de Benestar do centro que xunto co equipo ACAE será o que coordine e xestione todas estas situacións.

Na charla impartida no espazo creativo, o noso alumnado identificou situacións de violencia e como responder ante elas, dándolle unha serie de estratexias e buscando sempre o apoio da súa familia primeiro, de todo o profesorado do centro despois así como o dos seus iguais.

Esta é unha formación que dende o noso cole consideramos indispensable e que permite detectar situacións non desexadas entre o noso alumnado e darlle a resposta correcta, contundente e inmediata para atallar dende a raíz calquera tipo de conducat contraria á convivencia.

El Bibliobús de Alce

"O único importante nun libro é o significado que ten para ti." W. Somerset Maugham, escritor británico.

Cando se trata de contar un conto… Ninguén o fai mellor que Alce! Pero unha noite, sentado coa súa familia á calor do lume, a Alce non se lle ocorre nin unha soa historia que non contase xa. Necesita un libro con novos relatos. Ou quizá o que todos necesitan é unha biblioteca...

Este álbum ilustrado infantil convida os pequenos a penetrarse no marabilloso mundo dos libros e das bibliotecas. A través dunha divertida e enxeñosa historia ambientada nun bosque e os animais que viven nel, abórdanse temas como a narración oral de contos, a alfabetización, o pracer da lectura individual e a colectiva ou os libros e a capacidade que teñen de crear lazos entre as persoas. https://www.edelvives.com/es/tienda/el-bibliobus-de-alce

Desta volta a nova PisaCharcas Lucía e Xoán son quen nos amosan como os animais do bosque descobren aos máis pequenos a maxia dos libros e as bibliotecas, lugares que canto máis se visitan, máis nos enganchan. Moitas grazas aos dous por facernos ver a maxia destes lugares!

Unha Travessia polo Mar das Antelas

"Vem navegar com nós!!". A Arca da Noe

Noemí Vázquez é unha capitana de terra adentro onde o rural é surcado polas travesías máis fermosas ateigadas de música, poesía e vida. Ela e a súa Arca, recollen todo tipo de especies merecentes de ser vistas, ouvidas e comunicadas por un único denomidor, o amor á arte, á cultura e ao noso rural. Hoxe tivemos a sorte de por tela entre nós, para contarnos algunhas dos seus desembarcos. Esta muller brava é tamén profesora de Lingua Galega e Portugés na Limia. Tamén poidemos escoitar ás que ademáis forman parte deste fermoso proxecto, as Xilgras Mencía e Noa que nos delitaron cuns cánticos.

Que pracer poder contar con esta rosaliana, protagonista ela tamén das nosas Mulleres da Limia, libro que publicaremos proximamente en colaboración coa ANPA do noso cole e o CDR O Viso.

Moitas grazas, Noe, por facer o que fas e ser como es!!